АЙЫЫЛ ЧОК БОЛГАШ ЭКИ ШЫНАРЛЫГ АВТОМОБИЛЬ ОРУКТАРЫ
Ниити-российжи улусчу фронтунуң орук-транспорт комплекизиниң ажылының талазы-биле хөй-ниити чөвүлелиниң төлээзи Сергей Белоусов Кызыл хоорайның Спутник суурже автомобиль оруунуң септеттинип турар кезээниң шынарын хынап чораан. Мында Магистральная – Полигонная кудумчуларының белдиринде оруктарны калбартып турар.
Септеттинип турар кезектиң узуну 150 метр, ол дөрт дилиндектиг болур. «Восток» КХН-ниң участок мастери Айдың Саттың чугаазы-биле алырга, орук шывыын солууру-биле чергелештир чер орук чадыын белеткээри, ооң кыдыгларын быжыглаары болгаш аңаа асфальт чадары төлевилел езугаар көрдүнген.
Орук шимчээшкининиң айыыл чогун хандырар сорулга-биле, автомобиль оруунга орук демдектерин кадаар, Г-хевирлиг демир чагыларга светофорларны азар, чадаг кижилер кылаштаар черлерге, орук кыдыынга шаптараазын дозугларын кылыр, автобус доктаамнарын болгаш тротуарларны чаагайжыдар.
Амгы үеде керээлиг организация оруктуң машина-балгат эртип-дүжер кезээн калбартып, оруктуң адакы чер шывыын кылып турар.
Россияның Президентизи Владимир Путинниң даалгазы-биле 2019 чылда боттандырып эгелээн “Айыыл чок болгаш эки шынарлыг автомобиль оруктары” национал төлевилел орук тудуунуң федералдыг болгаш регионалдыг бүдүрүлгелериниң демниг болгаш сырый ажылынга улуг салдарлыг болган.
Айыыл чок болгаш эки шынарлыг автомобиль оруктарының шынарының нормативтиг негелделеринге дүгжүр оруктарның үлүүн бистиң республикада автомобиль оруктарының бүгү четкизинге 51,56 хуу, а найысылал Кызыл хоорайның оруктар четкизинге 76,32 хуу чедирер сорулга салдынган.
Национал төлевилелдиң “Орук ажыл-агыйының ниити системазын хөгжүдери” деп ийиги регионалдыг төлевилел ёзугаар республикада автомобиль оруктарының эң айыылдыг участоктарынга орукка шимчээшкинниң дүрүмнерин хажыткан таварылгаларны тырттырып көргүзер 59 фотовидео дериг-херекселдерин тургускан.
Орук ажыл-агый яамызының медээзинден А. Хертек белеткээн
«Шын» №74 2023 чылдың сентябрь 30
