Сентябрь 25-тен октябрь 1-ге чедир Тывада 264 кижи ОРВИ-ден аараан. Эрткен неделяга көөрде, аарыыр чорук 2,5 катап көвүдээн.
Росхереглелхайгааралының регионалдыг эргелелиниң медеглээни болза, 39-ку неделяда 10 муң чурттакчыга онааштыр 7,8 кижи тыныш инфекцияларындан аараан, эпидемиологтуг байдалдан 80,9 хуу эвээш. Эрткен неделяда 10 муң чурттакчыга онааштыр – 3,1 турган.
14 харга чедир уруглар ОРВИ-ни өскелерден аар эртип турарын статистика көргүскен. Эрткен неделяда стационарже кирген 49 кижиниң шуптузу уруглар болган. ОРВИ-ден аараан уругларның 60 хуузу 0-тен 14 харга чедир назылыг.
Шинчилээн биоматериалдарда грипп вирустары чок болган. Колдуунда риновирустар база аденовирустар илереттинген. Үстүкү болгаш адаккы тыныш оруктарын аартыр бокавирус эрткен неделяда тывылган.
Тываның Кадык камгалал яамызы чурттакчы чонну тарыдып алырынче кыйгырган. Грипп эпидемиязын болдурбас дизе, чурттакчы чоннуң 60 хуузу азы 199 муң кижи тарыткан турар ужурлуг. Эмнелге албан черлеринде чогуур вакциналар бар.
Кызыл хоорайның поликлиникаларында, республиканың 1 дугаар эмнелгезинде, кожууннар эмнелгелеринде база кожууннар аразының эмнелге төптеринде тарылга пунктулары ажылдап турар. Планның 30 хуузу хире азы республикада 59745 кижи октябрь 1-ге чедир тарыткан.
ТР-ниң Чазааның парлалга албаны.
«Шын» №75 2023 чылдың октябрь 4