Тыва Республикада уругларның эргелерин камгалаар талазы-биле бүрүн эргелиг төлээзи Саида Сеңгии:
– ТР-ниң Чазак Даргазының 2025 чылда кылып чоруткан ажыл-чорудулгазының түңнелдерин дыңнадывыс. Ниитизи-биле черле республиканың социал байдалында сайзырал эки деп көрүп турар кижи-дир мен. Чүге дизе оруктар, бажың-балгат тудуглары, аңгы-аңгы губернатор төлевилелдериниң боттанылгазы дээш угланыышкын бүрүзүнде кылып чорудуп турар ажыл хөй-дүр. Чүге албан-биле чуртталга оран-саваларының тудуу, оруктар, социал объектилерни онзалап демдеглеп турар мен дээрге, шупту кылып турар чүүлдер бичии уругларның сайзыралынга улуг ужур-дузалыг дээрзи билдингир. Чаш ажы-төлүвүс долгандыр бүгү-ле чараш чүүлдерни көрүп өзер болза, оларның келир үеде сайзыралынга эки. Чаш ажы-төл чараш бажыңнарга ада-иези-биле чурттаар ужурлуг. Бистиң келир үевис-тир. Адыр бүрүзү өг-бүлеге хамааржыр-дыр ийин. Чаа школаларны, уруглар садтарын эңдере тудуп тур ышкажыл. Ынчангаш ТР-ниң Чазаа 2025 чылда кончуг эки үре-түңнелдиг ажылдаан-дыр.
Бодумнуң ажылдап турар адырымга хамаарыштыр алыр болза, 2024 чылда «Уруг бүрүзү өг-бүлеге өссүн» деп федералдыг төлевилеливис эгезин салган. Ол төлевилелди эрткен чылын ТР-ниң Баштыңының деткимчези-биле республиканың алды кожуунунга эрттирдивис. Түңнелинде берге байдалда өг-бүлелерниң база ада-иезиниң хайгааралы чок арткан уругларның саны эвээжээн дээрзин отчёттан дыңнадывыс. Ол база эки үре-түңнел-дир.
Сөөлгү чылдарда өг-бүлелер-биле дорт ажылдаар деп тускай угланыышкынныг бис. Ону адрестиг ажыл дээр. Амыдыралы берге байдалда келген өг-бүлелерни берге байдалдан ушта тыртары, оларга моральдыг болгаш материалдыг деткимче кадары чугула болуп турар. Уругларның аас-кежии – ада-иезиниң чанында дээр болгай бис, бо сорулгаларны эрткен чылдан эгелеп Чазак-биле кады демнежип кылып чорудуп эгеледивис.
Буян ооржактың тырттырган чуруктары.