РФ-тиң Президент соңгулдалары-биле чергелештир Масленицаны бүгү республикага калбаа-биле байырлаан. Каа-Хем кожууннуң найысылалы Сарыг-Сепке орус чоннуң төөгүлүг байырлалын «Овация» элээдилер театры болгаш Культура хөгжүлдезиниң төвү организастаан.
Сарыг-Септиң Культура бажыңының девискээринде орус чоннуң культуразын, амыдыралын көргүскен сценажыгашты дерээн, хөгжүм куттулган байырланчыы-даа кедергей. Орус улустуң тоол маадырлары, скоморохтар кылдыр кеттинген оолдар, уруглар чыылган чонну ойнадып, хөгледип турлар.
«Овация» элээдилер театрының бичии артистери «Каттырбас кадын» деп орус улустуң тоолунга үндезилээн сценажыткан көргүзүг-биле байырлалды эгелээн. Ук театрның режиссеру Чодураа Игнатьева элээди артистериниң дугайында улуг чоргаарал-биле чугаалады:
— Бистиң «Овация» театрында аңгы-аңгы хар-назылыг оолдар, уруглар кээп турар. Улуг болгаш ортумак бөлүктүң уруглары-биле янзы-бүрү шиилерни тургускаш, үнүүшкүннерни кылып, республика чергелиг мөөрейлерге киржип турар бис. Чоокку үеде С. Маршактың «Багаж» деп шүлүүнге, Ш.Перронуң «Кызыл бөртчүгеш» деп тоолунга шиилерни, «Улу дугайында тоолчургу чугаа» деп театржыткан көргүзүгнү тургустувус. Ам Пушкинниң тоолдарындан шиилер тургузуп эгеледивис. Удавас «Поп болгаш ооң ажылчыны Балда дугайында тоолдуң» бирги көргүзүүн чонувуска бараалгадыр бис.
Элээди артистеривис актернуң уран аргаларынга, сцена чугаазынга, ритмикага дээш өске-даа кичээлдерде хүннүң-не өөренип турар. Шенелделиг школачы шиилерни база тургузуп турар бис. Уруглар бистиң театрже күзелдии-биле кээп турар. Баштай кээп тургаш, коргар, эки, тода чугааланып билбес турган болза, ам оларда актернуң уран аргалары, чогаадыкчы бодаашкыннары бар.
Бөгүнгү театржыткан көргүзүгде база бистиң уруглар киржип турар. Олар шупту «Овация» театрының кол составы-дыр. Бо Скоморохту ойнап турар элээди артизивис Богдан Попов-тур. Ол база бистиң театрның эң-не идепкейжизи, эки өөреникчизи-дир.
Масленицаның театржыткан көргүзүүнүң соонда чыылган чон орус чоннуң хендир дүрер, кадаг кадаар, канат тыртар, шоодай кедип алгаш чаржыр дээш өске-даа хөглүг оюннарга идепкейлиг кириштилер.
Блиннер чок Масленица кайыын турар, эң-не хөглүг оюн — «Блиннер-биле эстафета». Сковородка тудуп алгаш, чарышпышаан, блинин 3 катап өрү октаар оюн эң-не солун, каткы-хөглүг болду. Сарыг-Септиң чурттакчы чону Масленица байырлалын «Часкы карусель»-биле доосту.
Алдынай СОЯН.
Ада ТЮЛЮШТУҢ тырттырган чуруктары.
“Шын” №21 2024 чылдың март 20
