2020 чылдан тура республиканың бүгү кожууннарының культура албан черлеринде «Патриот» деп клубтар ажылдап турар. Эрзин кожууннуң «Патриот. Эрзин» клуву кожууннуң хөй-ниити организацияларының аразында эң эки ажылдыг деп санаттырып турар. Кожуунда болуп турар бүгү-ле патриотчу хемчеглер «Патриот. Эрзин» клубтуң киржилгези-биле эртип турар.
Чоокта чаа Ада-чурт камгалакчызының чылының байырлыг ажыдыышкынын ук клубтуң кежигүннери организастап эрттирген. Ол хемчегге кожууннуң шупту чогаадыкчы коллективтери киришкен: «РФ-тиң уран чүүл коллективи» деп аттың эдилекчизи «Эзир-Уя» фольклор ансамбли, хоочуннарның «Надежда» ыры-хөгжүм ансамбли, «Эрзин» ыры болгаш танцы ансамбли, «Чинчилиг» мода болгаш костюм театры, «Өлчей-Кежик» танцы коллективи база сумуларның салым-чаяанныглары.
«2020 чылда ТР-ниң Культура яамызының даалгазы-биле бүгү кожууннарның культура бажыңнарынга «Патриот» деп клубтар тургустунган. Ол-ла чылын Эрзин кожуунга база «Патриот. Эрзин» деп клуб ажылдап эгелээн. Ооң салбырларын суму бүрүзүнде ажыткан бис. Клубтуң ажыл-чорудулгазында чүгле патриотчу тема эвес, кожуунувустуң, сумувустуң сайзыралы дээш эң-не идепкейжи аныяктары болгаш улуг назылыгларывыстың киржилгези-биле бөлүктерни, ансамбльдерни, уран чүүл коллективтерин тургузуп турар бис.
Ол ышкаш «Патриот. Эрзин» клувунуң кежигүннери деткимче ажылдарында база идепкейлиг кирип турар. Чижээ, амгы үеде ТШО девискээринде дайынчы акы-дуңмаларывысты деткип, кожууннуң культура ажылдакчылары ай санында чыылданы организастап, ооң иштинде камгаланыр четкилер аргыыр дээн ышкаш буянныг ажылдарда база киржип турар. Волонтёрларывыс ТШО киржикчилериниң өг-бүлелеринге үргүлчү дузалажып турарлар.
Кожууннуң культура ажылдакчыларындан 4 кижи ТШО-же чораан — чурукчу башкывыс, чолаачывыс, одакчывыс база таңныылывыс. Ол коллегаларывыстың бирээзи чурукчу башкывыс бо хүннерде ТШО девискээринде тывылбайн турар деп медээ келген. Ол коллегавыстың өг-бүлезинге база дузаны чедирип турар бис. Чонувус-биле демнежип тургаш, акша чыылдазындан өске, боттуг дузаны база көргүзүп турар бис» — деп, Эрзинниң культура болгаш туризм эргелелиниң удуртукчузу Ольга Куулар чугаалаан.
Украинага фашизмге удур чөрүлдээлер эгелээрге-ле, Эрзинниң эрес-дидим оолдары бүгү Тываның эр кижилери-биле бир деңге, чамдыктары эки тура-биле, өскелери шериг албан эрттирип тургаш, хүлээлгезин күүседип тускай шериг операциязынче уурук-сууруктап чоруп эгелээн. Бо хүнде ТШО девискээринде тайбың амыдырал дээш дайзыннар-биле демисежип чоруур оолдарын чаңгыс чер чурттуглары тиилелгелиг чанып кээрин манап турар. А хары черге бажын салган Эрзинниң эрес-дидим оолдарының аттарын мөңгежидер сорулга-биле, кожууннуң төпчүткен ном саңы делгелгени организастаан. «Эрес-дидим чорук. Маадырлыг чорук. Ат-алдар болгаш төлептиг чорук» деп делгелгени кожуун төвүнүң культура одааның фойезинде дерээн. Ол делгелгези-биле ном саңының ажылдакчылары кожууннуң сумуларынче үнүүшкүннерни кылыр.
Алдынай СОЯН.
Авторнуң тырттырган болгаш интернет четкизинден хоолгалаан чуруктар.
“Шын” №6 2025 чылдың февраль 20
