Чуртта коронавирус деп халдавырлыг аарыгның тывылганын янзы-бүрү четкилерден билип, дыңнап, көрүп турар болгай бис. Ынчангаш ооң айыылын тургуспазын барымдаалап, ылаңгыя улуг назылыг хамаатыларга, Пенсия фондузунуң күрүне ачы-дузаларын электроннуг хевирге алырын сүмелеп тур бис.
Россияның Пенсия фондузунуң электроннуг хевирде сервистери Пенсия фондузунуң сайтызында (es.pfrf.ru) хамаатыларның хуу кабинединде, «ПФР Электронные сервисы» деп капсырылгада мөөңнеттинген. Ачы-дузаларны бодуңарның смартфонуңар (Google Play болгаш App Store), ол ышкаш күрүнениң база муниципалдыг ачы-дузаларның чаңгыс аай порталы «Госуслуги» (www.gosuslugi.ru) таварыштыр ажыглап болур силер.
Пенсия фондузунуң берип турары эң-не нептереңгей ачы-дузаларын, ол дизе: пенсия тыпсырының, эде санаарының (катап тургузарының) дугайында, ие капиталының күрүне сертификады алырының болгаш ооң акша-хөреңгизин ажыглаарының дугайында, пенсия болгаш социал төлевирлер алыр черин өскертириниң дугайында (банк азы почтадан) дээш оон-даа өске ачы-дузаларны электроннуг хевирге ап болур.
Ол ышкаш кижиниң пенсия назыны чоокшулай бергениниң дугайында, пенсияның хемчээлиниң база хевириниң дугайында, өске социал төлевирлер болгаш социал дузаламчы алыр эргезиниң дугайында шынзылгаларны (справкаларны) ап болур. Айыттынган ачы-дузаларны алырда электроннуг билдириишкиннерни хамаатылар долдурар.
Бир эвес сүме айтырып, консультация херек болза, айтырыгларны Россия Федерациязының Пенсия фондузунуң Тыва Республика салбырында «изиг шугум» телефоннарындан: 8 (39422) 9-60-60; 9-61-41, 9-61-42 азы социал четкиде Вконтакте бөлүүнде арынындан билип ап болур. Ол ышкаш кожууннарда пенсия эргелелдериниң “изиг шугум” телефоннары РПФ-тиң сайтызында «Контакты региона» деп капсырылгада мөөңнеттинген.
А бир эвес аргажок Пенсия фондузунче кээр ужурга таварышса, база-ла хууда кабинет таварыштыр баш бурунгаар бижидип алырын сүмеледивис.
Бодуңарны база чоок кижилериңерни камнаңар, кадык болуңар!
РФ-тиң пенсия фондузунуң Тывада салбырының парлалга албаны. #Шын