Келир чаа чылда шупту пенсионерлерниӊ акша төлевирин өстүрер.
Ооӊ мурнунда чүгле ажылдавайн турар улустуӊ пенсиязын өстүрүп турган. Ындыг-даа болза РФ-тиң Президентизи бо чылын шупту пенсионерлерге төлевирни деӊге өстүрер деп өскерилге киирген документиге атты салган. Ынчангаш улустуӊ ажылдап-ажылдавайн турарын, шалыӊыныӊ бар-чогун көрбейн, ам шупту пенсияларны өстүрер дээрзин Россияныӊ Социал фондузунуӊ Тывада салбыры дыӊнадып турар.
«Индексация соонда республикада камгаладылга пенсиязыныӊ 23 125 рубль ортумак хемчээлинге 1600 рубль немээр. Ол түӊ кижи бүрүзүнүӊ пенсиязыныӊ хемчээлинден хамааржыр дээрзин демдеглеп каайн. Индексацияны автоматчыткан чурум-биле чорудар. Россияныӊ СФ-тиӊ Тыва Республикада салбыры шупту санаашкыннарны боттары кылып турар болганда, ону санадыры-биле албан черинге кээри чугула эвес» — деп, удуртукчу Часкал Дараа тайылбырлаан.
Пенсияны өстүргени илдеӊ болзун дээш, тускай санаашкын ажыглаар.
Чижээ, ажылдап турар пенсионер бир айда 17 400 рубль ап турар дижик. Ол ажылдавайн турган болза, 23 400 рубль пенсия алыр. Өртектерниӊ өзүп турганын барымдаалааш, 2025 чылдыӊ январь 1-де пенсия төлевирин 7,3 хуу өстүрер. Ону чүгле 23 400 рубльден санаар. Ынчап кээрге, ол түӊнүӊ 7,3 хуузу 1708,2 рубль болур. Ынчангаш ажылдап турар пенсионерниӊ ай санында алыр акшазынга 1708,2 рубль немээр. Ооӊ холунга алыр пенсиязы 19108,2 рубль (17400 рубль +1708,2 рубль) апаар.
Ооӊ мурнунда пенсия өстүрген санында-ла, ажылдап турар кижиниӊ пенсиязынга немевейн турган хууларныӊ шуптузун ам ынчаар немээр.
Бир эвес пенсионер кижи ажылындан үне бээр болза, 2025 чылда өстүрген пенсиязыныӊ кырынга ооӊ мурнунда албаан индексациязыныӊ шуптузун немээш, алыр төлевириниӊ хемчээлин база өстүрүптер. Январьда эӊ улуг төлевирни ажылдан үнген пенсионерлер алыр. Тодаргайлаарга, шупту улустуӊ пенсиязын өстүрер, а немелде санаашкын чүгле ажылындан үне берген пенсионерлерге хамааржыр.
Чаа чылдан тура пенсияны 7,3 хуу өстүрерин планнап турар. Бир эвес чыл дургузунда өртектерниӊ өскени ол коэффициентини ажа бээр болза, Чазак пенсияны немей өстүрүп болур.
Ажылдап турар пенсионерлерге август айда төлевирни база немей өстүрер. Пенсионер кижини ажылдадып турар организация ооӊ камгалыдылга пенсиязыныӊ чаа дадывырын шилчидипкен соонда, Россияныӊ СФ-тиӊ Тыва Республикада салбыры чылдыӊ-на шилчидип берип турар.
Харылзажыр телефону: 8-800-100-0001
Р. ДЕМЧИК очулдурган.
“Шын” №100 2024 чылдың декабрь 28