Регионнуӊ 6 муӊ ажыг чурттакчызыныӊ пенсия үнер документизин Россияныӊ социал фондузунуӊ Тывада салбыры баш бурунгаар белеткээн.
Пенсия үнеринге баш бурунгаар белеткенип алыр. Шупту документилерни болгаш ында киирген медээлерни шын бижиир ужурлуг. Чүге дизе оларны долузу-биле ылап шын бижээнин баш удур хынап турар.
РСФ-тиӊ Тывада салбырыныӊ специалистери 2024 чылдыӊ эгезинден тура регионнуӊ 6 муӊ ажыг чурттакчызыныӊ пенсиязын томуйлаарынга чугула херек документилерин шын долдурарынга дузалаан.
Пенсияже үнер бетинде, бир-ийи чыл бурунгаар чугула херектиг документилериниӊ байдалын көрүп хынап алыр ужурлуг. Документилерни баш удур хынадып, көрдүрүп алыр дизе, чурттап турар черинде РСФ-тиӊ Тыва Республикада салбырыныӊ чон-биле ажылдаар албанынга чеде бээр.
Чон-биле ажылдаар албанныӊ адрезин Социал фондунуӊ регионда салбырыныӊ сайтызындан https://sfr.gov.ru/branches/tu... көрүп болур.
РСФ-тиӊ салбырыныӊ специалистери документилерни хынап тургаш, хамаатыныӊ пенсия алыр эргезин кажан ажыглап эгелээрин баш бурунгаар айтып бээр. Бир эвес ылап тодарадыр ужурлуг чүүлдер тыптып келзе, дузалажыр.
Келир үеде пенсиязыныӊ хемчээлин тодарадыр дээш, херек кырында ажылдап турганыныӊ дугайында медээлерни хынааш, ону шынзыдары-биле немей негелдени чорудуп болур.
РСФ-тиӊ Тывада салбырыныӊ чон-биле ажылдаар албанынга баарда, дараазында документилерни ап алыр:
- Паспорт, күш-ажыл дептери, шериг биледи, өөренип турарыныӊ дугайында документ, бадыланышкан херечилели (документилерде фамилиязы өске болза), уругларыныӊ төрүттүнген херечилелдери болгаш пенсия алыр эргезин ажыглаарынга херек өске-даа документилери.
Пенсияже эрте үнер хамаатыларга база документилерин баш бурунгаар хынадып алырын сүмелеп турар. Чон-биле ажылдаар албанга кээрде, паспортундан аӊгыда, өөренген стажыныӊ дугайында документини, уругларыныӊ херечилелин, пенсия алыр эргезин ажыглаарынга херектиг документилерин ап алыр.
Бо чылын 1961 чылда төрүттүнген эр улус, 1966 чылда төрүттүнген херээжен улус камгаладылга пенсиязын алыр эргезин ажыглаар.
2024 чылда камгаладылга пенсиязын томуйлаарынга, стажы 15 чылдан эвээжевес, 28,2 пенсия коэффициентизи херек.
Билип алыр чугула!
Назылап кырааны дээш пенсияны билдириишкин киирген хүнүнден тура томуйлаар, ынчалза-даа ол хамаатыныӊ пенсия алыр эргезин ажыглап эгелээр ай-хүнүн база өөренип көөр.
Документилерни баш бурунгаар хынадып алыры-биле дужааган болза, ону пенсия томуйладыр дээш дужааган деп санавас.
Бир эвес айтырыглар бар апарза, Чаӊгыс аай контакт-төвүнче долгап болур.
Телефону: 8-800-100-00-01. Ажыл хүннеринде 09.00-17.00 шакка чедер (долгаары халас).
РСФ-тиӊ Тыва Республикада салбырыныӊ медээлеринден.
“Шын” №92 2024 чылдың ноябрь 30