Сукпак суурда чаа школаныӊ тудуун 2024 чылдыӊ декабрьда дужаар турган. Тываныӊ Чазааныӊ болгаш тудугжуларныӊ эптиг-демниг ажылыныӊ ачызында тудуг ажылы бир чыл бурунгаар доосту берген. Амгы үеде школа 95 хуу белен болуп турар. Аӊаа 825 өөреникчи үшкү улдуӊда өөренип эгелээр.
Чаа школаны Тываныӊ улустуӊ башкызы Петр Морозов аттыг күрүнениӊ агролицейи деп адаар.
«Сукпактыӊ болгаш солагай эрик дачаларыныӊ уруглары, агролицейниӊ 284 өөреникчизи аӊаа өөренир. Девискээр аайы-биле бо лицейге хамааржыр ийи чурттакчылыг черлерниң кудумчуларын быжыглаан нормативтиг эрге-хоойлу актыларын ажылдап кылып турар» – деп, өөредилге сайыды Елена Хардикова чугаалаан.
Ада-иелер боттары школага келбейн, билдириишкинни клазыныӊ удуртукчу башкызынга берип каар дээрзин ук ведомство дыӊнадып турар. А чаа школага ажылдаар күзелдиг башкылар резюмени Өөредилге яамызыныӊ кадрлар килдизинге чедирип бээр. Амдыызында 74 башкыны ажылга хүлээп алган. Планнап алганыныӊ чүгле чартык кезии ол бооп турар.
Школаларда үшкү ээлчегни узуткаар деп аӊгы программаны Президент 2021 чылда саналдаан. Сукпакта чаа школаны бо программа-биле тудуп кылгаш, 2023–2024 өөредилге чылында боттандырар деп шиитпирлээн.
Өөредилге яамызыныӊ медээлеринден Р. ДЕМЧИК белеткээн.
“Шын” №98 2023 чылдың декабрь 23