Тывага полицияның эң тергиин чалыы өңнүктерин тодараткан. Бо хүннерде республиканың девискээринде "Полицияның чалыы өнүктери" деп 86 отряд ажылдап турар. «Полицияның эң тергиин чалыы өнүктери» деп атты чаалап алыры-биле, 14 отряд боттарының кожууннарын төлээлеп киришкен. Олар тус-тузунда боттарының школазынга, кожуунунга тиилекчилер.
Бо мөөрей 2014 чылда эгезин салган. Ук хемчегни эрттирип турар сорулгазы болза, уругларны патриотчу чорукка өөредири, хамааты хүлээлгелерин билиндирери болгаш кадык амыдыралче суртаалдаары, чон аразынга бодун шын алдынып билир кылдыр өөредири болуп турар.
Жюри кежигүннери бичии уругларның билиин, кандыг-бир чүүлдү кайы хире билирин, арга-мергежилин аңгы-аңгы номинацияларга дүүштүр үнелеп көрген. Оон аңгыда, арагага болгаш наркотиктиг бүдүмелдерге удур чогаадып кылган хана-солунун үнелеп көрген.
Мөңгүн-Тайга кожууннуң Мугур-Аксы ортумак школазының отряды шылгарааш, тиилекчи болган. Изиг-изиг тулчуушкуннуң түңнелинде ийиги черни Хову-Аксы ортумак школазының бичии «Истекчилери» чаалап алган. Үшкү черни Кызыл хоорайның 3 дугаар школазы-биле Таңды кожууннуң Бай-Хаак ортумак школазының өөреникчилери үлешкен.
/ Бистиң корр.
