Чогуур дүрүмнер ёзугаар, чаңгыс аай пособиени 12 ай дургузунда алыр кылдыр доктаадыр. Төлевирниң хуусаазы эрте бээрге, ону соксадыптар. Дараазында чылда узадырда, Социал фондуже катап база билдириишкинни киирер. Төлевирни алыр сөөлгү айының дургузунда баш удур билдириишкинни бижип болур.
Баштайгы төлевир алыкчылары 2023 чылдың январь айда болза, олар декабрь айда узадыр дугайында билдириишкинни киирер. Февраль, март дээш өске айларда төлевирни ап эгелээн улус хуусаа төнеринге чедир бир ай артканда, билдириишкинни бижиир. Бир эвес ада-иелер ол үе дургузунда төлевирни үзүк чок алыры-биле узадып четтикпейн барза, билдириишкинни ооң соонда-даа киирип болур. Төлевирни алырын чөпшээрептер болза, билдириишкин киирген айындан тура ап эгелээр.
Пособиени узадырда, эгезинде доктаадып турган үеде ышкаш Социал фонд ажылдакчылары социал деткимчениң хереглелин тодарадыры-биле, өг-бүлениң орулгазын болгаш өнчү-хөреңгизин көөр апаар.
Төлевир алыкчыларының хөй кезииниң чугула херек медээлерин социал фонд ажылдакчылары боттары тодарадып алыр болгаш ук хыналда үр болбас. Социал фондуже киирген билдириишкинни 10 хонук иштинде көөр. Бир эвес төлевирни алыр кылдыр доктаадыпкан болза, дараазында чурум ёзугаар ап эгелээр. Бо айда ооң мурнунда айның пособиезин санаар. Чижээ, февраль айда январьның, март айда февральдың төлевирин алыр. Төлевир алыкчызының банкыда агар санынче ооң мурнунда айның төлевири 3-түң хүнүнде, а почта дамчыштыр айның 1-ден 25-ке чедир кирер.
Чаңгыс аай пособиеже билдириишкинни Күрүне ачы-дуза порталынга, Хөй хүлээлгелиг төптерге азы Россияның ТР-де Социал фонд албаннарынга киирер.
Россияда чаңгыс аай пособиени 2023 чылдың январь 1-ден тура берип эгелээн. Ол ооң мурнунда бичии уругларга болгаш сааттыг херээженнерге берип турган элээн каш төлевирлерни ниити чаңгыс төлевир кылдыр солаан. Ук төлевирже бир кижиге хамаарыштыр амыдыраарының эң кудуку деңнелинден эвээш орулгалыг өг-бүлелер кордакчылап болур. Тывада ол 2024 чылдың январь айдан тура 15608 рубль апарган. Шынап-ла, деткимчени хереглеп турар улус алзын дээш, төлевирни доктаадырда, өг-бүлениң орулгазын болгаш өнчү-хөреңгизин санап көөр апаар.
2024 чылдың январь 1-ден тура амыдыраарының кудуку деңнелиниң өскени-биле чаңгыс аай пособиениң хемчээли база улгаткан. Ол регионда бичии уругга хамаарыштыр амыдыраарының кудуку деңнелиниң аайы-биле 50, 70 азы 100 хуу болур. Тывада ол 2024 чылдың январь айдан тура 15155 рубль апарган. Күш-ажыл кылып шыдаар улуг кижиге хамаарыштыр 17013 рубль болур. Төлевирни бичии уругга азы баштайгы хуусаазында эмчи учёдунга туруп алган сааттыг кижиге бээринден пособиениң хемчээли хамааржыр.
Аңгы билдириишкин киирген херээ чок. Бир дугаар төлевир февраль айда өскен хемчээли-биле кирип келир.
Бистиң корр.
“Шын” №3 2024 чылдың январь 17