РФ-тиң девискээринге чаа коронавирус инфекциязының тараарынга удур демисежир талазы-биле Чазактың чанында координациялыг чөвүлелдиң хуралы дүүн болуп эрткен.
Чоннуң, ылаңгыя эвээш акша орулгалыг өг-бүлелерниң амыдыралынга нарын байдалдарның тургустунуп турарын барымдаалап, РФ-тиң Чазаа немелде деткимчени бээр дугайында хуралга чугаалашкан.
Бажың болгаш коммуналдыг хандырылгалар төлеп алырынга субсидиялар октябрь 1-ге чедир кандыг-даа документилер дужаатпайн, узадып бээр. Газ, электри энергиязы, чылыг, изиг-соок суг хандырылгаларының ажылын соксатпас. Коммуналдыг хандырылгалар өртээн төлевээни дээш, торгаавас. Капиталдыг септелге дадывырын, бажың төлевирин соңгаарлатканы дээш, пеня салып, хөөлевес.
Даштыкы чурттардан келген кижиге болгаш ооң-биле чаңгыс бажыңда кады чурттап турар улуска эмчи хуудустарын бээр чаа чурумну тургускан. Ажылдап шыдавас дугайында эмчи хуудузун дужаапкан соонда, чеди хонганда ооң акшазын шилчидип бээр. Апрель 6-19 хүннеринде төлеп эгелей бээр.
Ол-ла хүн коронавирус дээш когараан компанияларга 1 чыл чедир үндүрүг төлевирин болгаш взностарны төлээрин соңгаарладып болурун, оон аңгыда орулгазы 50% батканда, 5 чылга чедир төлевезин доктааткан. Улуг бүдүрүлгелер болгаш бизнес организацияларының орулгазы 30% чедир бадар болза, 3 чылга чедир үндүрүг төлээрин соңгаарладыр деп доктаалды Россияның Чазаа апрель 6-да хүлээп алганын дамчыткан.
government.ru. #Шын