Декабрьның 19-та Россияның Президентизи Владимир Путинниң дорт дамчыдылгазы парлалга конференциязы-биле чергелештир болган. Россияның Президентизи журналистер болгаш чурттакчы чон-биле 4 шак 27 минута дургузунда чугаалашкаш, 76 айтырыгга харыылаан. Күрүнениң баштыңынга ниитизи-биле 2,5 сая ажыг айтырыглар келген. Россияннарның эң-не хөй салган айтырыглары: социал политика, чурттаар оран-сава, экономика, кадык камгалалы, чуртталга-коммунал ажыл-агыйы, инфраструктура, ТШО. Дорт эфирге харыылаттынмаан айтырыгларны регионнарның удуртукчулары-биле улаштыр ажылдаар.
Бистиң республиканы төлээлээн «Тува24» телеканалдың журналистери айтырыг салып шыдаваан-даа болза, Президент Тываны демография талазы-биле эки көргүзүглерлиг деп демдеглээн. «Кажан Президент Россияда чарлаттынган Өг-бүле чылында Тываның чонунуң өзүп-көвүдеп турарын демдеглеп турда, ийи дакпыр өөрүнчүг болгаш харыысалганы даандырып турар» деп, Владислав Ховалыг дорт дамчыдылга соонда социал четкиде бодунуң арынынга бижээн.
В. Путинниң кол медеглелдери:
🏴 “Орешникти” дүжүр адар кымда-даа ындыг арга чок. Херек болза, шенелде чорудуп болур-ла: Барыын чурттар Киевтиң бир объектизин айтып берзин, Россия ынаар согугну бериптер.
🏴 Российжи шериг фронтунуң бүгү шугумунда бурунгаарлаашкында чоруп турар. Дайзынны Курск облазындан үндүр ойладып эгелээн.
🏴 Зеленский соңгулданы эрткеш, легитимный эргени алырга, чүгле ынчан Россия ооң-биле чугааны кылыр. Тайбың дугайында документилерге Москва чүгле Украинаның хоойлузунга дүүшкен удуртукчу-биле ат салыр.
🏴 Россияга түр тайбың дугуржулгазы эвес, тайбың херек: үр хуусаалыг, быжыг, айыыл чок чорукту идегелдиг магадылап турар.
🏴 Барыынның санкциялары Россияга шаптыктап, доктарларны тургузуп турар, ынчалза-даа “олар бисти өлүрүп шыдавастар”.
🏴 Сирияда болуушкуннарны Россияның аштырыышкыны деп чугаалап болбас: Москва аңаа террористер анклавы тургстунмазын дээш чедип турган, ниитизи-биле ол сорулгазын чедип алган.
🏴 Израиль — Сирияда болуушкуннарның кол киржикчизи, сирий черлерни эжелеп турарын Россия буруу шаап турар.
🏴 Миграция айтырыглары Россияда чидиг болуп турар. ИХЯ иштинге миграция адыры-биле ажыл чорудар аңгы килдис тургузар болза эки.
🏴 Россияның экономиказының өзүлдези ийи чыл дургузунда 8 хуу четкен, шалың 9 хуу өскен. Инфляция харын дүвүренчиг медээ апарган-даа болза, ниитизи-биде байдал турум болгаш бүзүрелдиг.
🏴 Өг-бүле ипотеказынга күрүнениң талазындан кандыг-даа өйлээшкин турбас ужурлуг.
🏴 Курск облазынга чурттаар оран-саваны катап тургузарынче сертификаттарны тыпсыр, когараан чурттакчылар шупту ону алыр.
🏴 Курск облазында тулчуп турар дайынчыларга төлевирлерни эрткен хуусаа-биле эде санааш, төлээр ужурлуг.
🏴 В. Путин Россияны камгалап ап шыдапканын чугаалаан: “Чүгле камгалап эвес – тамы эриинден ырай берген бис”.
“Шын” №98 2024 чылдың декабрь 21