Декабрь 8-те Владимир Путин бодунуң кандидатуразын чаа хуусааже депшидер деп турарын медеглээн. Кремльге Россияның Маадырларының шаңнаашкын езулалының соонда ол дугайында дыңнаткан.
Президент соңгулдаларынга киржилгениң дугайында айтырыгны Кремльдиң Георгий залынга Россияның Маадырларын “Алдын сылдыс” медаль-биле шаңнап турда, «Спарта» батальоннуң командири Артем Жога салган деп демдеглеп турар.
Россияның Төп соңгулда комиссиязы соңгулдаларны 2024 чылда үш хонуктуң — март 15-тен 17-ге чедир эрттирериниң дугайында доктаалды хүлээп алган. «Хөй-ниитиниң үзел-бодалы» Фондунуң сан-медээзи-биле алырга, российжилерниң 70 хуузу, ооң иштинде Тываның чурттакчылары база, Владимир Путинниң чаа хуусааже депшилгезин деткип турарлар.
Тываның Баштыңы Владислав Ховалыг база Владимир Путинниң Президент соңгулдаларынга киржилгезиниң дугайында шиитпирин деткээн.
«Чурттуң Президентизи Владимир Владимирович бөгүнгү бодунуң шиитпири-биле бистиң чуртувустуң келир үезин быжыглаан. Чуртувуста, ылаңгыя бистиң аныяк республикавыста амыдыралдың шынары кайы хире бедип олурарын көрүп тур бис. Даштыкының ыйыдыышкыны турза-даа, Россия кайы хире күштүүн болгаш быжыын катап-катап бадыткап тур. Ол бүгүде чурттуң баштыңының ачы-хавыяазы улуг!» деп, бодунуң блогунга губернатор бижээн.
Шак ындыг шиитпирни ТР-ниң Дээди Хуралының депутады, ”Чаңгыс демниг Россия” партияның Тывада салбырының секретарының оралакчызы Аяс Мөңге база деткип, соңгулдаларның Россияның быжыглалынга болгаш айыыл чок чоруунга киирип турар ачы-хавыяазын демдеглээн.
«Россияның Президентизиниң соңгулдаларындан бөгүн дыка хөй чүүлдер хамааржыр. Ындыг болганда, ону ажык-чарлыг эрттирип, бистиң чуртувус долу хемчээлдиг амыдырап турар дээрзин, бодунуң күжүнге, Тиилелгеге бүзүрелдиин база катап көргүзер ужурлуг” — деп, Аяс Мөңге тайылбырлап турар.
Буяна САТ.
“Шын” №95 2023 чылдың декабрь 13
