Тывада суг объектилеринге болгаш ооң чоогунга алдынар дүрүмнер талазы-биле чурттакчы чон ортузунга профилактиктиг ажылды күштелдирген. Республиканың кожуун чагыргаларының удуртукчуларынга бо дужаалды понедельникте болуп эрткен регион Чазааның Аппарат хуралынга берген.
Чоокта чаа Тожу кожуунга болуушкун ажылды күштелдиреринге чылдагаан болган. Февраль 8-те, эртенги үеде Доора-Хем суур чоогунда улуг хемге улгады берген эр кижи дошче ойлуп дүшкен. Ол чоок-кавызынга элээди оолдар ону кончуг дүрген эскерип кааш, чогуур дузаны көргүскенинден айыыл-халап чайлай берген.
Тус черниң 9-ку классчылары сугда дүшкен эр кижини эскерип кааннар. Камгалал албанын кончуг дүрген кыйгыртыпкаш, дош кырынга илчирбелендир туттунчуп алгаш, сугга дүшкен кижини дуза келгижеге салбааннар. Россияның ОБЯ-ның Тыва Республикада 16-гы өрт-камгалал кезээниң өртчүлери кончуг дүрген келгеннер. Узун ыяштарны ажыглап чорааш, сугга дүшкен кижиге четкеш, ооң амы-тынын камгалаан. Дүрген дуза эмчилери ол эр кижини шинчээш, байдалы анаа деп түңнээн.
Камгалал операциязы чедиишкинниг доозулган, камгалакчылар элээди оолдарның шиитпирлиг болгаш шын хөделиишкиннери дээш четтиргенин илереткен, оларның эрес-дидим чоруун албан демдеглээр.
Республиканың хамааты камгалал болгаш онза байдалдар албанының демдеглээни-биле алырга, 2025 чылда сугга дүшкен бир дугаар болуушкун бо. Эрткен чылдың ноябрьдан эгелеп Тывада дошталган суг объектилеринге чоруурунуң айыылының дугайында чоннуң билиглерин бедидер угланыышкынныг «Чуга дош» деп чаңчылчаан профилактиктиг акция эртип турар. Бо хүнде хемчеглер он муң хире чурттакчыларны хаара туткан.
Эрткен чылын Тываның суг объектилеринге 30 таварылга бүрүткеттинген. Когараан шупту кижилерниң дөртүн камгалап алган, бир кижи ам-даа тывылбаан, 27 кижи өлген.
Эрге-чагырга черлери ындыг болуушкуннарны болдурбас дээш, суг объектилеринге хамаатыларның айыыл чок чоруунуң хемчеглерин дыңнадыр ажылды күштелдирип турар. Камгалакчылар дош кырынга айыыл чок чоруктуң билиглеринче угланган лекциялар болгаш беседаларны немей эрттирер. Оон аңгыда, суг объектилеринге хайгааралды күштелдирип, кижилерниң доштап чоруур черлеринге айыыл чок чоруктуң демдектерин тургузуп, чаартыр.
А. МОНГУШ.
Чурукту интернет четкизинден хоолгалаан.
“Шын” №5 2025 чылдың февраль 13
