Чаа чылдың байырлал хүннеринде кем-херек үүлгедиишкиннерин болдурбазы кончуг чугула дээрзин Тываның Баштыңы Владислав Ховалыг демдеглээн. Бо чылын регионнуң профилактиктиг кампаниязы идепкейлиг ажылдап турар. Республиканың Чазааның кожууннарже доктаамал чоруп турар кежигүннериниң дыңнадыы-биле кожууннарда хөй санныг культурлуг болгаш спортчу хемчеглерни эрттирип турар. Бичии болгаш элээди уругларга түр када хостуг үезин эрттирер төптерни ажыткан.
Шивилиг, Белдир-Арыг, Бүрен-Аксы, Чаа-Суур, Мөрен суурларның чурттакчылары “Кадык камгалал” национал төлевилелдиң ачызында туттунган ФАП-тар болгаш 1 амбулаторияның байырлыг ажыдыышкыннарының киржикчилери болганнар.
Профилактиктиг учётта турар өг-бүлелер онза хыналдада. Хүннүң-не 18:00 шактан 22:00 шакка чедир оларның бажыңнарын специалистер кезип турар. Чазактың төлээлери Тываның Баштыңының даалгазы-биле дыштанып чедип келген студентилер-биле база ужуражып, оларның келир үеде мергежилин, ажылга тургустунарын, студентилер ниитилелиниң иштинде кады ажылдажылгаларны чугаалашкан.
Ол ышкаш кожууннарже чоруп турар сайыттар болгаш Чазактың оралакчы даргалары ЧЭК болгаш чуртталга-коммунал ажыл-агыйларының байдалын, одалга складтарының ажылын, чоннуң хөмүр-биле хандырылгазын хайгаарап турарлар. Нарын айтырыгларны ыыт чокка эрттирбезин кожуун чагыргаларынга Владислав Ховалыг сагындырган. Онза байдалдар азы озал-ондактар дугайында дарый дамчыдары чугула дээрзин ол демдеглээн.
