Бо чылын Тывага көдээ черлерже ажылдап чоруп турар 30 эмчи “Көдээниң эмчизи” программага киржип, 1-ден 2 сая рубль түңнүг шүүдел акшаларны алырлар дээрзин республиканың Кадык камгалал яамызы дыңнадып турар.
Ол ышкаш ортумак эмчи билиглиг “Көдээниң эмчизи” программаның киржикчилери база 1 сая рубль хемчээлдиг деткимче төлевирни алыр. Оон аңгыда, эмчилерни деткиириниң программазын таварыштыр тоң хереглелдиг 10 специалист 1-1 сая рубльди алырлар: программаже эрткен чылын бактаап киргеннер-биле кады беш чылдың дургузунда 200-200 муң рубльди 159 эмчиге төлээр.
Эрткен чылын планга дүүштүр “Көдээниң эмчизи/”Көдээниң фельдшери” программага 30 специалист киржип тургаш, Тываның Кадык камгалал яамызының дилээ езугаар республикага 31 немелде үлүгнү берген. Шак ынчаар, бүдүн чылдың дургузунда ук программаның иштинге Тываның суурларынче болгаш бичежек хоорайларынче 61 специалисти чоруткан.
Кадык камгалал яамызының оон ыңай дыңнатканы болза, республиканың Чазааның деткимчези-биле 2021–2023 чылдарда ажыл-биле хандыртынган 15 эмчиге 200 муң рубльди тус-тузунда төлээр, ындыг саң-хөө дузазын олар беш чылдың дургузунда алырлар. Ук төлевир алыкчыларының санында чеди кижи өске регионнардан келген, алдызы ординатура, ийизи специалитет дооскан болуп турар.
#Шын #Тыва #Кадыккамгалалы #Көдээниңэмчизи #Медээлер
Программаларның ачызында
30 марта 2023
33