Хоорай төвүнде хостел
Найысылалдыӊ Тыва эки турачылар кудумчузунуӊ 26 дугаарлыг каът бажыӊда аалчылар чурттадыр хостел бар болган. Хоорай прокуратуразы чуртталга хоойлужудулгазы биле санитарлыг дүрүмнерни сагып турарын хынаары сорулга-биле аӊаа барып четкен.
Хуу сайгарлыкчы өрээлдерни, удуур-чыдар оруннарны тус-тузунда акша-биле садып, хөлезиге берип турган. Ийи квартира ышкаш таарыштыр чогааткан сес аӊгы өрээлди чурттавас чер кылдыр шилчитпээн.
Каът бажыӊныӊ чурттакчылары-биле кады чаӊгыс эжиктен үнүп-кирер кылдыр кылып каан. Ындыг хостел ажылдап эгелээрге, чурттакчыларныӊ амыр-дыжы читкен, эзирик улус хөй-ниити чурумун үреп турган.
Херээжен сайгарлыкчыны ооӊ мурнунда санитар-эпидемиология хоойлужудулгазын, хөй-ниитиниӊ корум-чурумун хажытканы дээш, хемчээн ап турганын тодараткан.
Хоойлу ёзугаар хөй квартиралыг каът бажыӊны аалчылар чурттаар гостиница ышкаш ажыглап болбас. Ынчангаш аалчылар чурттадып турган сайгарлыкчыныӊ ындыг ажыл-чорудулгазын соксадырын хоорай прокуратуразы негээн. Судтуӊ шиитпири күш кирген, а прокуратура ооӊ күүселдезин хынаар.