Бо чылын 3887 өг-бүле "Социал хөмүр-даш" губернатор төлевилелиниң деткимчези-биле одаар чүүлдү алыр. Тываның Одалга болгаш энергетика яамызының медээлээни-биле алырга, одаар чүүлдү хөй ажы-төлдүг болгаш тускай шериг операциязының киржикчилериниң өг-бүлелери 2145 тонна халас хөмүр-дашты азы 4,8 куб токпакты алыр. Деткимчеге көрдүнген одаар чүүлдүң ниити түңү – 8100 тонна хөмүр-даш биле 533 куб токпак ыяш.
Ноябрь айның ортандан бээр социал хөмүр-дашты даңзыда ады кирген хамаатыларның бажыңнарынга чедирип эгелээн.
«Хөй ажы-төлдүг авага, меңээ, кышкы үеде одаар чүүл халаска алыры дыка өөрүнчүг-дүр. Социал хөмүр-даш губернатор төлевилели дээш чазак-чагыргага өөрүп четтиргенимни илередир-дир мен» – деп, Кызыл кожууннуң чурттакчызы Орланмаа Сарыглар чугаалаан.
«Деткимче алырынга хөй ажы-төлдүг азы айда орулгазы чурттаарынга чедишпес өг-бүлелер документилерин дужаар: ада-иениң паспорттары, ажы-төлүнүң херечилелдери база чурттап турар бажыңының документизи. Келир 2026-2027 чылда күрүнеден деткимче алыксаар өг-бүлелер 2026 чылдың эге айларында тус черлерде өг-бүлеге болгаш уругларга социал дуза чедирер төптерге документилерин четчелээш, дужаар ужурлуг» – деп, Кызыл кожууннуң социал ажылдакчызы Долаана Моңгуш сагындырган.
2025 чылдың декабрь төнчүзүнге чедир ук төлевилелдиң деткимчезин алыр даңзыда ады кирген өг-бүлелерге доозазынга одаар чүүлдү чедирери планда көрдүнген.
Айдың ОНДАР.
Чурукту интернеттен алган.
“Шын” №48 2025 чылдың декабрь 11