Чаа чылда чагыдып алган «Шын» солунувус келбейн баарга, кезек девидеп турдувус. Оон дараазында, почтальонувус хөй арынныг, дашты өңнүг солун эккеп бээрге, дыка-ла амырадывыс. Баш бурунгаар солунга өскерлиишкиннер болур деп чарлап турганын номчуваан болдувус.
Ам солунувус неделяның четвергтерде кээп эгелээн. Ооң мурнунда солун озалдап-даа кээр турду, ам чаңгыс үнерге, почта ажылдакчыларынга дажыыры-даа эвээжээр, биске-даа эптиг. Мырыңай 32 арынныг солунда номчуур чүүлдер база көвүдээн-дир. Бис, кырганнар, солун-сеткүүл, ылаңгыя «Шынны» номчувайн баар болзувусса, аштаан-суксаан-биле дөмей апаар бис. Ынчангаш дыка-ла өөрүп тур бис.
Солуннуң үнген ийи үндүрүлгезин дыка-ла сонуургап номчудувус. «Шоол ховузу — сөөлгү өртээли» деп материалда репрессия үезинде удуртукчу кижилерниң салым-чолу ханныг аажылалга таваржып турганын номчааш, кижиниң кылык-килеңи хайны бээр. «Шынның» аалчызынга база дыка солун кижилерни чырыдып турар-дыр. Ылаңгыя телевизорга бо-ла көстүп кээр аныяк журналист оолдуң эртем-билиин, сонуургалдарының хөйүн магададывыс. «Үш чүүл эртемниг оол» дээни ёзулуг шын.
Аныяк үелеримде спортка хандыкшылдыг турган болгаш, хол бөмбүү, шыдыраа маргылдааларын эрттирбейн көөр турдум. Ам назылап кырааш, маргылдаалар көөр харык чок апардым. Солуннуң сөөлгү үндүрүлгелеринде хоочун спортчу А. Чамбал-оолдуң бижээн чүүлдеринден республикада болуп турар маргылдааларны, тиилекчилерин номчааш, билип алыр аргалыг апардым.
Ынчангаш моон-даа соңгаар солунувус мындыг чараш, хөй, солун материалдарлыг үнер дээрзинге идегеп тур бис.
«Шынның» коллективинге четтиргенивисти илередип, улуг-улуг чогаадыкчы чедиишкиннерни күзедивис.
Дамдынчап ДОНГАК.
Кызыл хоорай.
«Шын» №4 2025 чылдың февраль 6