Бөгүн, январь 8-те, уран чүүл мөгейикчилеринге Тывада сураглыг фоточурукчу Василий Балчый-оолдуң "Өөрүшкүм, уяралым — шиилерим" деп фотоделгелгези улуг белек болган.
Фоточурукчунуң делгелгезин В.Көк-оол аттыг Национал хөгжүм-шии театрының фойезинде делгээн. Делгелгениң байырлыг ажыдыышкынынга найысылалдың интеллигенциязы киришкен.
Василий Балчый-оол делгелгезинге РФ-тиң алдарлыг артизи, ТР-ниң улустуң артизи, тыва театрның кол режиссеру чораан Алексей Ооржакка тураскааткан эң-не онзагай 20 ажылын делгээн.
Байырлыг ажыдыышкынга келген артистер, чурукчулар, хөгжүмчүлер, эртемденнер база политиктер юбиляр фоточурукчуга байыр чедирген чылыг-чымчак сөстерни илереткен.
Бо делгелге дугайында улуг чүүлдү "Шын" солуннуң дараазында үнер үндүрүлгезинден номчуур силер.
А.Соян.
Авторнуң тырттырган чуруктары.
