Тыва дыл хүнүнүң бүдүүзүнде октябрь 28–30 хүннеринде Национал школа хөгжүдер институт республиканың тыва дыл, чогаал башкыларынга 2025 чылдың тыва дылда кол күрүне шылгалдазынга хамаарыштыр өөредилге курстарын эрттирип турар.
Өөредилгениң күрүне стандарттарынга дүүштүр шылгалда бо чылгы өскерлиишкиннерни, чаартылгаларны таныштырбышаан, эрткен чылгы шылгалданың түңнелдери-биле доозукчуларның кол-кол частырыгларынга доктаап, лекциялар болгаш практиктиг ажылдарны институттуң методистери, эртем ажылдакчылары болгаш школаларда ажылдап чоруур арга-дуржулгалыг башкылар эрттирип турар. Тывызыксыг, нарын тыва дылывыстың сайгарылгаларлыг практиктиг кезектери солун болгаш чымыштыг, үре-түңнелдиг эртип турарын курстарның киржикчилери демдеглеп, чапсарларда изиг-изиг маргыжып, хөөрежип, каттыржып, арга-дуржулгазын солчуп турарлар.
Тыва дыл башкылары чаа билиглер, солушкан бедик дуржулга-биле ажы-төлдү бедик көдүрлүүшкүннүг өөредип, кол күрүне шылгалдазынга ыяк белеткээри чугаажок.
Надежда КУУЛАР,
Национал школа хөгжүдер институттуң тыва дыл лабораториязының
эргелекчизи.
Авторнуң тырттырган чуруктары.
«Шын» №83 2024 чылдың октябрь 30
