“Россия – арга-шинектерниң чурту” деп Президент платформазының бир кезээ болур “Өөредилге адырының шапкынчылары” төлевилелдиң дөрткү сезону ВДНХ-ның “Россия” Бүгү-делегей делгелге-чыыжында эгелээн. Аңаа Тыва Республиканың өөредилге адырындан эргелеп-башкарыкчылар, башкылар болгаш студентилер арга-дуржулга солчур, а ол ышкаш Россия Федерациязының өөредилге системазының эргелеп-башкарыкчы кадрлар системазының курлавырынче кирер шинектиг болурлар.
“Өөредилге адырының шапкынчылары” мөөрейни РФ-тиң Чырыдыышкын яамызының деткимчези-биле «Өөредилге» национал төлевилелдиң «Социал лифтилерни – кижи бүрүзүнге» федералдыг төлевилелдиң иштинге боттандырып турар.
“Россия – арга-шинектерниң чурту” деп саарылга чок автономнуг организацияның чиңгине директорунуң бирги оралакчызы Алексей Агафонов төлевилелдиң эрткен чылда боттанылгазының түңнелдериниң дугайында чугаалап, чаа сезонда аңаа киржилгениң оруктарын таныштырган.
«Бүгү Россиядан башкылар ниитилежилгезиниң 230 муң ажыг төлээлери “Өөредилгениң шапкынчылары” төлевилелге киржип турарлар, идепкейжи болгаш эгелекчи саналдыг кижилер моон-даа соңгаар бистиң одуруувуска немежири чугаажок – деп, Алексей Агафонов демдеглээн. – “Россия – арга-шинектерниң чурту” деп Президент платформазының төлевилелдери социал лифтилерни улам чедингир болдуруп, бистиң чуртувустуң хамаатыларынга бодунуң арга-шинээн улам ажыдарынга, мергежилиниң аайы-биле депшииринге дузалажыр».
“Өөредилгениң шапкынчылары” төлевилелге өөредилге адырындан эргелеп-башкарыкчылар, башкылар болгаш сургуулдар (төлевилелге бүрүткедип турар үеде 18 хардан биче эвес назылыг) киржип болур. Бүрүткелди flagmany.rsv.ru. сайтыда ажыткан.
Ооң эрткен сезонунда Тыва Республикадан аңаа киржилгениң дугайында 491 чагыг кирген, бир кижи мөөрейниң түңнелинде бодунуң регионун төлээлеп киришкен.
“Өөредилгениң шапкынчылары” төлевилел дээрге чүгле профессионал мөөрей эвес, а өөредилге адырында эргелеп-башкарыкчыларга, башкыларга амы-хууда депшииринге дуза кадар хемчеглер болур. Ол студентилерни башкы мергежилинге хаара тудар чаа чепсек-тир.
Бүрүткеткен соонда, төлевилелдиң киржикчи бүрүзү күзээни ёзугаар үш угланыышкын талазы-биле кирериниң шинчилгезин ап болур: команда тургузуп алгаш, аңаа хартаачы болуру, күрүнениң өөредилге политиказының адырынга билиглер, байдалга таарышкан арга-дуржулга. Шинчилгениң түңнелдеринге үндезилеп, профессионал билиглерни болгаш билири айтырыгларны сайзырадыр сүмелерни хевирлээр.
Бо чылдың февральдан август айга чедир мөөрейниң киржикчилеринге «Өөредиглиг марафон» деп капсырылга чедингир апаар. Ону Чырыдыышкын деп күрүне университеди, Россияның улус ажыл-агыйының болгаш күрүне албанының академиязы, Стратегтиг эгелээшкиннер агентилелиниң «Сенеж» деп эргелелиниң мастерскаязы, Экономиканың дээди школазы болгаш чурттуң мурнакчы өөредилге организациялары ажылдап кылган. «Өөредиглиг марафон» чүгле бүрүткеткен киржикчилерге көстүр. Ол мөөрейге белеткениринге дузалаар.
Август эгезинде “Өөредилгениң шапкынчылары” деп профессионал мөөрей эгелээр. Ооң киржикчилери адыр аайы-биле онаалгаларны күүседир, ооң түңнели-биле киржикчи бүрүзүнге рейтингини тыпсыр болгаш мөөрейниң чартык финалынга киржир киржикчилерниң даңзызын тургузар.
Мөөрейниң дорт киржилгелиг чартык финалдары РФ-тиң субъект бүрүзүнге эртер. Эргелеп-башкарыкчыларның болгаш башкыларның төнчү шылгалдалары октябрьда. Студентилер ырактан чаданың түңнелдери-биле октябрьда төнчү шылгалдаларга ужуражыр.
А. ХЕРТЕК белеткээн.
“Шын” №14 2024 чылдың февраль 24
