2023 чылда Тывага бүдүрген регионалдыг ниити продукция эрткен чылдыындан 5,5 хуу көвүдеп (Россияның ВВП – 2,5 %), 101,07 млрд рубль чедерин баш бурунгаар санап түңнээн. ТР-ниң Экономиктиг хөгжүлде яамызы бо көргүзүглерни республиканың Чазаанче киирген.
Бо чылдың январь–сентябрь айларда регионнуң экономиказының кол адырларында өзүлде — эки көргүзүг. Ылаңгыя тудуг адырында бедик темп хевээр артып, ажылдың хемчээли 31,5 хуу улгаткан. 2022 чылдың 9 айынга деңнээрге, бо чылдың ол-ла үезинде чуртталга бажыңнарын 10 хуу хөй дужааган. Бо чылдың төнчүзүнге чедир ниити шөлү 140 муң дөрбелчин метр чуртталга бажыңнарын ажыглалга дужаар.
Эрткен чылга деңнээрге, кол капиталче инвестиция салыышкыны 3,2 хуу немешкен. Үүрмек бараан саарылгазы 5,2 хуу, төлевирлиг ачы-дуза хемчээли 3,9 хуу өскен. Инфляция көргүзүүнден шалың төлевириниң боттуг хемчээли 6,4 хуу улуг. Биче болгаш ортумак бизнестиң чаа киржикчилериниң саны үш катап көвүдээнинден ажыл чоктар саны эвээжээн.
Тываның экономиказында сайзыралдың деңнели дараазында үш чылда хевээр артар деп, республиканың Экономиктиг хөгжүлде яамызы санап турар. 2024 чылда регионалдыг ниити продукт 5,6 хуу өзүп, хемчээли 106,8 млрд рубль чедер. 2026 чылда биче болгаш ортумак сайгарлыкчы чорук субъектилериниң саны 9,3 муң чедип, азы 2023 чылга деңнээрге, 15,4 хуу хөй болур. 2026 чылда 175 муң дөрбелчин метр чуртталга шөлүн ажыглалче киирер.
ТР-ниң Чазааның парлалга албаны
“Шын” №82 2023 чылдың октябрь 28