Республикада «Тываның маадырлары» программага киржир күзелин илереткен чагыглар хүлээп алыышкыны кидин-түлүк. Программаның организастыг комитединиң кежигүннериниң дыңнадып турары-биле, бо хүннүң байдалы-биле 170 ажыг кижи программага киржир күзелин илереткен.
ТШО киржикчизи Ачыты Нурзат ук программаны деткип турар: “55-ки гвардейжи мото-адыгжы (даг) бригадада ажылдап турар мен. Тываның Баштыңының чарлаан программазын сонуургап тур мен. Биске эртем-билиг чедип алыр болгаш республикавыстың чаагай чоруу дээш ажылдаар кайгамчык арга-дыр”.
Программа шугуму-биле дээди болгаш ортумак профессионал эртемниг боорда, тускай шериг операциязынга киришкен Россияның хамаатылары өөренирлер. Эң баштай олар шилилге эртеринче күзелин илередип, чагыгны киирер. Ону кылырда, «Герои Тувы» деп албан сайтызынга бүрүткелди эрткеш, чагыгны долдурар. Ол сайтыда улаштыр-ла базым бүрүзүн тодаргай айтып, бирден бир чокка тайылбырлап турар. Улаштыр анкетаны долдургаш, кыска эссе бижиир. А апрель айда чагыг киирген кордакчылар тестини эрткеш, аңгы чугаалажыышкын-биле шилилгени эртер.
“Тываның маадырлары” программаның оркомитет кежигүнү Андрей Шокарның дыңнатканы-биле, билдириишкиннерни март 6-дан июнь 30-ге чедир хүлээр. Киржикчилерни шилээн соонда, түңнел даңзыны доктаадыр. ТывКУ-га аңгы-аңгы угланыышкыннар аайы-биле өөредилге бөлүктерин тургузар.
Кордакчылар аразындан шилилгени эртип, шылгараан маадырлар бо чылдың сентябрь 1-ден 2026 чылдың июль 30-ге чедир өөренирлер. Өөредилге программазын Тываның күрүне университеди биле Россияның улус ажыл-агыйының болгаш күрүне албанының академиязының Күрүне удуртулгазының дээди школазы деп институду ажылдап кылып турар.
Бистиң корр.
Чуруктарны интернет четкизинден хоолгалаан.
"Шын" №10 2025 чылдың март 20