Кызылдың 1 дугаар школазының өөреникчилерин ажыктыг, солун болгаш каткы-хөглүг дыштандырары-биле «Родничок» деп хүндүскү лагерьниң ажылы июнь 2-де эгелээр. Эге школаның баазазынга чаңгыс сменаны 100 уругга 21 хонук дургузунда эрттирер.
Лагерьниң кол угланыышкыны – социал-гуманитарлыг хевирге “Хөглүг аян-чорук” деп аттыг эртер дээрзин ооң удуртукчузу Татьяна Вержбицкая дыңнадып турар. Ол школаның уругларының чайгы дыштанылга лагерин 5 чыл дургузунда удуртуп турар. Татьяна Владимировна ооң мурнунда школага үр эвес ажылдааш, РФ-тиң Федералдыг кеземче күүседир албанныӊ ТР-де эргелелинге кинолог болуп, 15 чыл дургузунда ажылдаан. Оон хүндүлүг дыштанылгаже үнгеш, эртеминиң аайы-биле катап школаже эглип кээп, Кызылдың 1 дугаар школазында күш-культура башкылап, 10 чыл ажылдап чоруур.
Ооң бодалы-биле, амгы үеде уруглар бичиизинден тура телефоннар көрүп, эвээш шимченип турарының хараазындан сөөк-даяк аарыгларындан эртежик аарып турар. Ынчангаш оларның сөөк-даяан хөй шимчедири-биле шимченгир болгаш кашпагай оюннар ойнадыры чугула.
– Күш-культура кичээлинде бөмбүк болгаш янзы-бүрү херекселдер-биле ажылдап билбес уруглар хөй. Бөмбүктү тударын, ону удур октаарын үргүлчү өөредип турар бис. Күш-культура кичээлдери чаш кижиниң бүгү талазы-биле дең-дески сайзыраарынга ажыктыг салдарны чедирип турар. Шимченгир оюннар үезинде уругларның эп-найыралы база быжыгар – деп, Татьяна Вержбицкая чугаалап турар.
Лагерьниң программазында янзы-бүрү хөглүг, спортчу оюннар болгаш культура-массалыг хемчеглерден аңгыда, кинотеатр, хоорайның сесерликтеринче үнүп агаарлаар экскурсияларны киирген.
Татьяна Владимировна Россияның хүндүлүг донору, сад болгаш ногаажыдылга ажылдарынга ынак. Ол кара чажындан дириг амытаннарга ынак болуп, спорт-биле өңнүктежип, дириг бойдус эртемин улуг сонуургал-биле өөренир турган. Кызылдың башкы институдунуң биология болгаш күш-культура эртемин 1995 чылда дооскан. Чашкы үезинде янзы-бүрү ынак сонуургалдары чоорту ынак мергежилинче шилчий бергенин ол демдеглеп турар.
Ада-иелерге болгаш уругларга бот-боттарын камгалажып, карактажырын, хүндүлежирин, хемнер-сугларга болгаш оруктарга оваарымчалыг, серемчилелдиг чоруурун башкы кичээндирип турар. Уругларны чажындан дириг амытаннар, ыт азы диис аразынга кижизидип өстүрүп каарга, сагыш човангыр, кээргээчел, дузааргак кижи болуп өзүп келир. Шак ынчаар өскен уругларда каржы-хажагай сеткил чок болур дээрзин ол демдеглеп турар.
/ Алиса ДОНГАК.
Чуруктарны хууда архивтен алган.
"Шын" 2023 чылдың май 27 №38
