2026 чылдың август 17-20 хүннеринде Тыва Республиканың найысылалынга «Буддизм культуралар диалогунда: кижи төрелгетенниң келир үези» деп бир дугаар делегей чергелиг буддийжи шуулган болуп эрткен. Бо улуг хемчээлдиг хемчег 20 ажыг чурттардан буддийжи культураның, философияның, эртемниң, хөй-ниити ажылдакчыларының болгаш дипломаттарның төлээлерин каттыштырган. «Россети Сибирь Тываэнергонуң» энергетиктери шуулганның шупту объектилерин бүзүрелдиг чырык-биле хандырып, Кызылдың архитектурлуг сонуургаанчыын бедидеринге үлүг-хуузун киирген. Республика Баштыңы Владислав Ховалыг энергетиктерниң ажылын бедии-биле үнелээн.
Шуулганга элээн каш ай белеткенген. Энергокомпанияның специалистери чырык дамчыдар шугум чагыларының чырыын чаартып, Кызылдың төвүнде трансформатор подстанцияларын болгаш үлелге пунктуларын чаңгыс аай аян-шинчиже киирген.
Шуулган үезинде компанияның ажылдакчыларынга чырык четкизиниң бүзүрелдиг болгаш айыыл чок ажылдаарын хандырар харыысалгалыг даалганы берген. Бүгү объектилерниң үзүктел чок ажылын хандырар дээш, «Чырык дериг-херекселдерин ажыглаарын күштелдирген карта-схеманы» ажылдап кылгаш бадылаан. «Россети Сибирь Тываэнерго» компанияның 90 ажылдакчызы чырык четкизиниң объектилерин доктаамал контрольдап, хыналда ажылдарын чоруткан.
Белеткелдер үезинде энергетика объектилеринге пландан дашкаар хыналдаларны, ооң иштинде тепловизорлуг контрольду чоруткан. Шуулган шөлдеринге эң-не бүзүрелдиг чырыкты хандырар дээш, чырык бээр ниити күчүзү 700 кВт беш дөстү тургускан.
Тываның Баштыңы Владислав Ховалыг энергетиктерниң ажылынга четтиргенин илереткен: «Тывага делегей чергелиг буддийжи шуулганны эрттирери улуг алдар-дыр. Россияның чоннарының чаңгыс деминиң чылында аалчыларны бистиң республикавыстың онзагай культуразы болгаш шажын-чүдүлгениң ханы ужур-чаңчылдары-биле таныштырары өөрүнчүг болду. Бо болуушкун культуралар аразында харылзааны быжыглап, Тываны чуртта буддизмниң кол төптериниң бирээзи деп эрге-байдалды бадыткаан. Шуулганның инфраструктуразын белеткээринге база доктаамал чырык-биле хандырылга ажылдарынга улуг үлүг-хуузун кииргени дээш, энергетиктерге четтиргенивисти илередип тур бис».
«Россети Сибирь Тываэнергонуң» башкарыкчы директору Алексей Таранков мону демдеглээн: «Делегей чергелиг буддийжи шуулган ышкаш мындыг чугула болуушкунга белеткенирде, чүгле бүзүрелдиг чырык-биле хандырылга эвес, а республика найысылалының овур-хевири дээш бистиң ниити харыысалгавыс база хамааржыр. Чаарттынган объект бүрүзү шуулганны бедик деңнелге эрттиреринге энергетиктерниң үлүг-хуузу-дур. Кызыл хоорайны аалчыларга-даа, чурттакчыларга-даа таарымчалыг, арыг, чырык болдурар дээш кызып ажылдаан бис».