Кижизидикчи башкыларның отчёттары кызырлыр
РФ-тиң чырыдыышкын сайыды Сергей Кравцов ТАСС-ка берген интервьюзунга уруглар садтарында ажылдап турар кижизидикчи башкыларның отчёттарын хоойлужудулга деңнелинге кызырганын дыңнаткан. Мурнуку чылдарда система чок бюрократия ёзугаар кевин-херекчок хөй-ле документилер кылып, оларны долдурар артык чүъктү башкылардан адырар ажылдар чоруп турар. Ынчангаш артык отчёттарны ап каапкаш, кижизидикчи башкыларга чүгле 2 отчёт арттырып каанын сайыт чугаалаан.
Уруглар садтарынга «алдын стандарт»
Уруглар садтарының номнар, оюннар, мультфильмнериниң «алдын стандартын» тургузары көрдүнген. Шак ындыг чаңгыс аай даңзыны эртемденнер болгаш эксперттер хамааты бөлүктер-биле кады кылып турар деп РФ-тиң чырыдыышкын сайыды Сергей Кравцов дыңнаткан.
«Бүзүреп болур ужурлуг» эки номнар, оюннар, мультфильмнерниң даңзызын тургускаш, кижизидикчи сорулгалар аайы-биле чаңгыс аай методиктиг сүмелер болгаш комплектилерни ажылдап кылып турар. «Добрые игры» болгаш «Орлята - дошколята» төлевилелдерин дамчыштыр Чырыдыышкын яамызы уругларның өг-бүлелерин быжыглаар чаңгыс аай кижизидикчи девискээр тургузар угланыышкынны улаштыр сайзырадып турар.
Бузурукчу мөлчүкчүлер боттарын кымнар кылдыр таныштырып турарыл?
Иштики херектер яамызының дыңнадып турары-биле алырга, телефон дамчыштыр кижилер мегелеп турар бузурукчу мөлчүкчүлер боттарын колдуунда-ла полиция ажылдакчылары, күрүне органнарының төлээлери болгаш харылзаа операторлары кылдыр таныштырып турар. Эң-не хөй таваржып турар «ажылдакчылар» даңзызында 9 мергежил бар. Эң хөйү банк ажылдакчылары, полицейжилер болгаш эрге-хоойлу камгалаар органнар ажылдакчылары, соталыг харылзаа операторлары, маркетплейстер садыгжылары азы бажыңче бараан чедирер албаннар кылдыр боттарын мегелеп таныштырып турар. Дараазында эмнелге ажылдакчылары, ажыл берикчилери, таныыр улузу болгаш төрелдери, харын-даа мырыңай айыыл чок чорук албанының ажылдакчызы мен дээр таварылгалар нептерээн. Бо бүгүнү РФ-тиң ИХЯ-зының парлалга төвү дыңнаткан.
Кайы регионнарда ортумак пенсия 30 муңдан ажыгыл?
ТАСС статистиканы өөренип көргеш, 2026 чылдың август айның байдалы-биле Россияның 12 субъектизинде ортумак пенсия 30 муң ажып турар деп тодараткан.
Социал фондунуң медээлери-биле алырга, 30 муң ажыг рубльге дең ортумак пенсия Карелияда (31,1 муң), Коми Республикада (32,3 муң), Ненец автономнуг округта (38,9 муң), Архангельск облазында (31,7 муң), Мурманск облазында (34,3 муң), Ханты-Мансийск автономнуг округта (37,2 муң), Ямал-Ненец автономнуг округта (36,5 муң), Якутияда (33,8 муң), Камчаткада (37,5 муң), Магадан облазында (37,8 муң), Сахалин облазында (33,8 муң), Чукоткада (42,2 муң) демдеглеттинген. Россияга 2026 чылдың август айда пенсия хандырылгазының ортумак хемчээли 25 469 рубль болган.
АҮК ажылдакчыларының шалыңы 2029 чылга чедир 94 853 рубль чедир өзер
2027 чылда көдээ ажыл-агый ажылдакчыларының шалыңы 87 696 рубльге дең болур, а 2028 чылда – 91 204 рубль чедер. Бо санаашкыннарны көдээ ажыл-агыйны сайзырадыр болгаш көдээ ажыл-агый барааннарының рыногунга чиг эт болгаш аъш-чемниң өртектерин өйлээриниң күрүне программазының паспортунда айыткан. Оон аңгыда көдээ ажыл-агый ажылдакчыларының ортумак саны (даштындан дакпырлап ажылдаар улустан аңгыда) бүгү организацияларны катай алырга, 2027 чылда 919 860 кижи болур ужурлуг, а 2028 чылда – 901 463, дараазында 2029 чылда 883 434 кижи болурун санап көргүскен.
Материалды ТАСС-тың чуруктарлыг медээлеринден Н. КУУЛАР белеткээн.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn