Чүс чылда болуп көрбээн халап
Март 28-те Дагестан Республиканың девискээринге суггур чаъс болгаш күштүг хат хадаан соонда, регионга онза байдал чурумун чарлаан. Махачкала, Дербент хоорайларда, Ахты, Куппа, Касумкент, Избербаш, Кумух, Дагестанские Огни суурларда электри чырыы, ижер суг хандырылгазы, чугула аргыжылга оруктары үзүлген, чамдык көвүрүглерни болгаш автомашиналарны үер алгаш барган.
Хоорай, суурларның кудумчуларында чурттакчыларны суг халавындан айыыл чок черлерже дажыыр камгалал ажылдарын ОБЯ-ның камгалакчылары дүн-хүн чок чорудуп турар. Республиканың коммунал ажыл-агый албаннары бүгү күжүн мөөңнеп, үерге удур ажылды чорудуп турза-даа, агаар-бойдустуң байдалы экиживейн турар. Ынчангаш чурттакчыларын бажыңнарындан үнмезин дилеп турар.
Шак-ла ындыг үер Чечен Республиканы, Ингушетияны база тавараан. Муң-муң чурттакчылар ижер суг, электри чырыы чок арткан. Ол ышкаш оруктарны үер чире шаап каапкан, хөй көвүрүглерни суг алгаш барган. Чечен Республиканың Беной-Ведено суурунче баар кол орукту, Балансу суурже Ножай-Юрт трассаны үер чире шаап каан. Автуры суурже бетондан кылган кончуг быжыг көвүрүгнү база үер алгаш барган. Чурттакчыларның аргыжылгазы үзүлген.
100 чылда болуп көрбээн үер халавындан ылаңгыя Дагестан Республика хөй когараан дээрзин МИЧ-те дүвүренчиг медээлер удаа-дараа үнүп турар.
Чуруктарны болгаш медээни https://ruskomp.com/news/
https://ren.tv/longread/ сайтылардан алган.
Часкы үер
Март 30-де Новосибирск облазының девискээринде тос муниципалдыг тургузугда 21 участок эрээн хар суунга алыскан дугайында регионнуң Чазаанга болган оперативтиг хуралга Россияның ОБЯ-ның Новосибирск облазында эргелелиниң даргазы Виктор Орлов дыңнаткан. Сугга алыскан черлерде регионнуң ОБЯ-ның камгалакчылары дүн-хүн чок ажылдап турар.
Чылдың-на часкы үеде эрээн хар суунга алзып турар черлерниң чурттакчылары баш бурунгаар суг айыылы келбээнде, чоок-кавыда бедигээштерже үнүп, сугдан камгалап ап шыдапкы дег чүүлдерин ынаар дажып алыр болгаш “дүвүрел чемоданын”, азырап турган мал-маган болгаш дириг амытаннарының дугайында база утпазын сүмелеп турар.
Чурукту болгаш медээни ИТАР ТАСС-тан алган.
“Шын” №12 2026 чылдың апрель 2
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY