Орус улустуң чемнери
Борщ, «колобок», окрошка, винегрет, «Оливье», «Сельд под шубой», «Мимоза» салаттар дээш өске-даа орус чоннуң чемнеринге хамаарыштыр ГОСТ стандарттың (барааннарның шынарынга хамаарыштыр күрүне негелделерин тургузуп турар нормативтиг документ) төлевилелин ажылдап кылган дээрзин ТАСС (Россияда албан ёзузунуң медээлерин тарадыр албан чери) дыңнаткан.
Ук документиде өске-даа орус чемнерни канчаар белеткээриниң дугайында сүмелер база кирген. Чижээлээрге, варениктер, блиннер, янзы-бүрү запеканкалар, зефир, горчица, хрен, компот, горохтуг болгаш капусталыг мүн дээш оон-даа өске.
Төлевилелдиң баштайгы кезээнде 133 чем кирген болза, ам-даа 130 хире чемни ук даңзыже киирери планда көрдүнген. Орус чоннуң национал чеминиң концепциязын тодарадырынга дузалаар бирги документ дээрзин үлетпүр болгаш садыг-саарылга сайыдының оралакчызы Роман Чекушов дыңнаткан.
«Орус кухня» угланыышкынын шилип алган сайгарлыкчыларга төлевилел дузалаар дээрзи билдингир.
Коммунал ачы-дуза төлевири
Чуртталга-коммунал ажыл-агыйының (ЧКА) эң бедик тариф деңнелин эде көөр эргени Монополияга удур федералдыг албан черинге (ФАС) бээр хоойлу 2026 чылдың апрель 3-те күш кирген дээрзин Күрүне Думазының Даргазы Вячеслав Володин дыңнаткан.
Коммунал ачы-дуза төлевири – чоннуң эң-не хөй көдүрүп турар айтырыгларының бирээзи. Монополияга удур албан чери 2025 чылда хамаатылардан болгаш организациялардан коммунал ачы-дуза хереглели дээш 50 ажыг млрд үндезин чок черге үндүрүг тыртканы илерээн.
ФАС-тың негелделерин күүсетпейн турар албан-дужаалдыг кижилерге административтиг шииткел база күш кирген. «Харыысалга чок албан-дужаалдыг кижилер хоойлу хажыдыышкыннары дээш торгаал төлээринден чайлап шыдавас апаар» — деп, ол демдеглээн.
Кылымал угаан транспорт адырында
Россияның транспорт организацияларының 45 хуузу кылымал угаан технологияларын ажыглап эгелээн. Эрге-чагырга ук адырны улам чурумчудар дээш, нормативтиг баазаны белеткеп кирипкен дээрзин транспорт сайыдының оралакчызы Борис Ташимов дыңнаткан.
Россия ол адырны бүрүнү-биле чурумчудуп эгелээн. Чогуур албан черлери кылымал угаан дугайында эге хоойлуну ажылдап кылып турар. Аңаа хамаарыштыр ниити дүрүмнер турар ужурлуг дээрзи билдингир.
Узун назылаар дээш…
15 сая российжилер узун назылаарының тускай программазында хаара туттунган дээрзин Россияның күш-ажыл болгаш социал политика сайыды Антон Котяков идепкейлиг узун назын программазының тергииннерин тодарадыр Бүгү-россияның түңнелдерин таныштырган алдыгы хемчегге дыңнаткан.
Херечилел-биле Абхазияга чедип болур
14 харга чедир российжилер төрүттүнген дугайында херечилел-биле Абхазияга чедип болур дээрзин РФ-тиң Президентизиниң Күүсекчи эргелелиниң Аппарат начальнигиниң бирги оралакчызы Сергей Кириенко «Абхазия: келир үеже инвестициялар» шуулганның пленарлыг хуралынга дыңнаткан.
Назы четпээн ажы-төлү-биле аян-чоруктаар эптиг байдалдарның ачызында туризм адырынга бурунгаар хөгжүлде тургустунуп келген дээрзин Сергей Кириенко демдеглээн.
/ ТАСС-тың медээлеринден Айдың ОНДАР чыып тургускан.
“Шын” №14 2026 чылдың апрель 16