Бо хүннерде бистиң республикада солун аалчылар, Казахстанда Бүгү-делегейниң тогдук кушту камгалаар фондузунуң чиңгине директору Каттышкан Араб чурттарындан Мухаммед Салих аль Бейдани биле Халифа Аль Райсси чедип келген.
Олар “Убса-Нур ыйгылаажы” күрүнениң бойдус камгалалдыг чериниң удуртукчузу Диинмей Балбан-оол болгаш өске-даа специалистери-биле кады тогдук куштуң оолдары - 48 тогдукчугашты дээрже ужудуп салган. Ол куштарны Казахстанда “Шейх Халифтиң тогдук өстүрер төвүнге” өстүрүрген болуп турар.
Олар ам Тываның Эрзин талазында бойдус камгалалдыг девискээриниң черлик бойдузунда хостуг ужуп турарлар.
Бүгү-делегейниң тогдук кушту камгалаар фондузу ук куштуң санын көвүдедир болгаш ону камгалаар талазы-биле делегейде мурнуку одуругда турар. Бо кушту кадагалап, камгалаар талазы-биле программага деткимчени Абу- Даби Чазаа берген.
Амгы үеде делегейде чүгле дөрт чуртта тогдук тудуп азыраар черлер бар: Марокко, Казахстанда база ийизи Абу-Дабиде.
Араб чурттарындан келген аалчыларның Тывага келген чылдагааны, Тыва Республика бо куштарның эң-не соңгу талада чурттап турар девискээринге хамааржып турар. Тогдук деп куш Делегейниң бойдус камгалалының эвилелиниң Кызыл дептеринче кирген ховар куштарның бирээзи. Эртем- шинчилел ажылдарының көргүзүглери-биле, Тывага ол куштарны 2005 чылда көрген. Олар Тываның делгемнеринде чурттап, өзүп турар болган. Тыва ады – челер-тогдук дээр.
Ол ышкаш ховар куштарны өстүрери-биле шак мынчалдыр черлик бойдусче салып турар чөөн чүк чурттарының санынга 15 дугаары кылдыр Россия киргени бо.
Каттышкан Араб чурттарындан келген эртемден аалчы Мухаммед Салих аль Бейдани бо ховар куштарның ужудуушкунунуң узун оруунуң дугайында барымдаалыг фильмни тырттырып турар. ”Бо мээң бүгү назынымда кылып чоруур ажылым-дыр. Ховар дээн чараш куштарны камгалап-кадагалаар даалганы меңээ Эмираттарның бирги Президентизи, хүндүлүг Заид ибн Султан ибн Халифа Аль Нахайян берген. Ынчангаш бис элээн үр үе дургузунда бо ажылды чорудуп турар бис” –деп, эртемден чугаалаан.
К.Монгуш