Дааш-шимээн чок будкалар
Москваның метрозунда «Комсомольская» болгаш «Нижегородская» транспорт төвүнде бир дугаар дааш-шимээн дыңналбас будкаларны тургускан. Ол будкаже кире бээрге, шимээн чок боор. Ынчангаш орукка чорааш, шимээн чок чер хереглей берзе, будкаже киргеш, телефон таварыштыр чугаалажып азы бир-ле дарый кылыр ажылын кылып ап болур.
Будка бүрүзү чаңгыс кижиге таарымчалыг кылдыр кылдынган. Ында USB болгаш Type-C порттар, ажылдаар станция, адаптивтиг чырыдылга болгаш агаарладыр чер бар.
Будкаларны тускай капсырылга таварыштыр азы эжикте QR-кодту сканерлээш, арендалап ап болур. Амдыызында чыл төнчүзүнге чедир будканы ажыглаары халас.
Мамонт дижи дээш херекке онаашкан
Кыдаттың транспорт компаниязының чолаачызы Амур облазындан 3 сая рубль өртектиг 100 ажыг килограмм мамонт диштерин үндүр сөөртүрүн оралдашкан дээрзин регионнуң прокуратуразы дыңнаткан.
Үнелиг диштерни кызыгаар эрттирип алыр дээш, улуг техникага чажырып алган болган. Прокуратура кеземче херээн оттурган. Херек үүлгеткен хамаатыны хоойлу ёзугаар беш чыл чедир хосталгазын казып шиидип болур.
Когаралдың түңү 1 сая
ТШО-нуң киржикчилеринге дээш волонтёрларның чыып алган чүүлдерин шын эвес ажыглап, боду ап турганы дээш, Донецкиниң бир чурттакчызын РФ-тиң Иштики херектер яамызы болгаш Федералдыг айыыл чок чорук албаны (ФСБ) тудуп хоругдаан.
Янзы-бүрү чылдагааннар-биле ол кижи волонтёрлардан чугула херек чүүлдерни тускай операцияларның киржикчилеринге дээш чыып алган. Кем-херек үүлгедикчизи ийи мотоцикл, электри генераторлары, тепловизор, пневматика дээш оон-даа өске чүүлдерни боду ап алган болган. Ол өнчү-хөреңгиниң хөй кезиин садыпканы билдинген. Когаралдың түңү бир сая хире рубль болган. Кеземче херээн оттурган. Кем-херек үүлгедикчизин 6 чылга чедир хоругдалга олуртуп болур.
Шыдыраа чемпионнары
Россияның шыдыраа чемпионадының түңнел оюнунга Анна Шухман биле Арсений Нестеровтуң тиилээнин Россияның Шыдыраа федерациязы дыңнаткан. 22 харлыг А. Нестеров карьеразында бир дугаар чемпион атты чаалап алган, а 16 харлыг А. Шухман маргылдааның төөгүзүнде эң аныяк тиилекчи болган.
Онзагай делгелге
Псков музей-заповедниктиң архивинден православ чоннуң онзагай каасталгалары болгаш херээжен болгаш эр улустуң идик-хеви, эдилелдери Вологда хоорайга бир дугаар делгеттинген. Экспонаттарның аразында 5 кг деңзилиг 22 кезектиг херээжен улустуң мөңгүн баш каасталгазы болгаш XIX чүс чылдың онзагай брошказы бар деп Кирилло-Белозерский музей-заповедник дыңнаткан.
Музей-заповедниктиң делгелге салбырының эргелекчизи Юлия Лебедеваның демдеглээни-биле алырга, делгелге тус черниң чонунуң культуразының янзы-бүрү талаларын таныштырар. Оон аңгыда янзы-бүрү каасталгаларны делгээн. Алдарлыг чурукчу Анна Калашникова-Руттуң чогаатканы графиктиг ажылдарын база көрүп болур» — деп, Юлия Лебедева демдеглээн.
Делгелге «Өг-бүлениң үнелиг чүүлдери болгаш культура инфраструктуразы» федералдыг төлевилелдиң деткимчези-биле болуп турар.
Төтчеглекчилер туттурган
Сахалин облазында өлүрери хоруглуг балыкты туткан төтчеглекчи балыкчыларны туткаш хоругдаан.
300 хире кета балык, четкилер болгаш балыктаар херекселдер, үш моторлуг резин хемелер болгаш беш машинаны херим иштинден болгаш тудуглардан тыпкан. Ажыл-чорудулганың түңнелинде бир сая рубль түңнүг когаралды төтчеглекчилер чедирген. Кем-херек үүлгедикчилерин беш чылга чедир хоругдаар.
Журналистерге тураскаал
Россияда журналистерге тураскааткан 20 тураскаал турган. Олар шупту албан-хүлээлгезин күүседип чорааш, чок болган репортёрларга тураскааткан. Тобольск хоорайга 2000 чылда Чечняга чок болган фотожурналист Александр Ефремовтуң тураскаалын мөңгежиткен. Андрей Стенинге, Сергей Коренченковка, Андрей Вячалога тураскааткан скульптурлуг композиция Донбасста турар.
21 дугаар тураскаалды «Орус журналистер» деп ат-биле Россияның төвү Москва хоорайда ТАСС бажыңының баарында салган. Журналист мергежилге болгаш Россияның медээ четкилеринде идепкейлиг ажылдап чоруур корреспондентилерге, журналистерге тураскааткан тураскаал-композицияны байырлыг байдалга ажыткан.
Ховар тывыш
Архангельск облазындан 340 караттыг улуг алмаз тывылган. Ол Россияда эң-не улуг алмаз кылдыр санадып турар. Ховар казымал байлакты “он чылдың тывыжы” деп адаан. Россияның чаа төөгүзүнде шак ындыг улуг алмазты 5 удаа тыпкан болуп турар.
Айдың ОНДАР белеткээн.
Медээлерни ТАСС, «Вести» каналдан алган.
Чуруктарны интернеттен алган.
“Шын” №40 2025 чылдың октябрь 16