Школаларда Тиилелге музейлери
Күрүне Думазының депутады Ольга Казакова чоокта чаа болган “Тиилелге демниг чорукта” деп шуулганга школаларда Тиилелге музейлери уруг-дарыгның патриотчу кижизидилгезиниң чугула кезээ апарганын демдеглээн:
“Музей – чоннуң маадырлыг чурттап эрткен оруунуң шынныг бадыткалының баазазы. Бөгүн шак ындыг музейлер дыка улуг хүлээлгени күүседип турар – эрткен төөгүнү хажыдыксаан улуска улуг моондакты тургузуп турар болгаш школачыларның төөгүнү кадагалап арттырарынга бедик харыысалгазын оттуруп турар”.
Узун ажылчы неделя
Россияның чурттакчылары октябрь айның төнчүзүнде алды хонук ажылдаар. Узун ажылчы неделя октябрь 27-ден эгелээш, ноябрь 1-де доостур. Ооң ужуру ноябрь 1-де субботаның дыштаныр хүнүн ноябрь 3-че, понедельникче, чылдырганы болуп турар.
Кыдатче садыгланыр дээш
Россияның чурттакчылары массалыы-биле Кыдатче садыгланыр дээш шуужуп туруп берген. Ооң чылдагааны – Кыдатче визаны ап каапканы. Кыш удур чиик өртектиг идик-хеп, чаа айфоннардан аңгыда, чаа эт-сеп аймаан безин садып алыр арга тыптып кээрге, ону ажыглаан чон барык 80 хуу чедир чиигедип каан өртектиг, шынары эки чүүлдерни күзелдии-биле садып ап турар.
Чамдык сайтыларда айтып турары-биле, үш хонуктуң Манчьжурия, Гуанчжоу болгаш Пекинче турларже 35-60 муң рубльдиг чоруп болур. Ол акшаже самолет өртээ, аалчылар бажыңынга чурттаары болгаш экскурсия кирип турар.
Блиннер дег доштар
Кемерово облазында Назас хемде дыка чараш төгерик далганнар дег чүс-чүс доштар салдап турар апарган. Агаар медээчилериниң дыңнадып турары-биле, ол регионга ховар болур болуушкуннуң чылдагааны – агаарның температуразының бирде чылып, бирде сооп, үзүктелиишкинниг хар чаап турарындан хемниң кырында чараш доштар тыптып келген.
Хөккейни деткээн
«РОЛЬФ» Россияның хөккейге чыынды командазының албан ёзу-биле партнёру апарган.
Россияда регион бүрүзүнде бичии болгаш чалыы хөккей командаларын деткиири-биле, спорттуң бо хевирин нептередир сорулгалыг өг-бүле бүрүзүнге хөккейлээринге шаптараазыннар турбас болзун дээш, чурттуң база бир улуг автодилери «РОЛЬФ» Россияның Хөккей федерациязы-биле дугуржулганы чарган.
Бо чаа эгелээшкинниң кол-ла сорулгазы – массалыг спортту улам-на нептередип, келир үениң кончуг шыырак хөккейжилерин кижизидип өстүрери болуп турар.
Россияда херээженнер хөй
Росстаттың сөөлгү медээзи-биле алырга, Россияда херээжен чоннуң саны эр улустан 10 сая хөй болуп турар. Российжи хамаатының ортумак назыны 41 харга дүгжүп турар болза, эр улус – 38, херээженнер 43 харлыг болуп турар.
Адаларга немелде шөлээ
Күрүне Думазының депутаттары Россияга чаа төрүттүнген чаштарның адаларынга немелде шөлээ дугайында айтырыгны көдүрүп эгелээн. Чаа төрүттүнген уругнуң адазы бижимел билдириишкин ёзугаар чылда чаңгыс удаа бир неделяның шөлээзин дилеп ап болур. Ол шөлээни ажыглавайн барган таварылгада ооң орнунга акша төлевири көрдүнмээн.
Медээлерни К. МОНГУШ белеткээн.
Чуруктарны интернеттен хоолгалаан.
«Шын» №41 2025 чылдың октябрь 23