Чазак хуралынга Россияның Маадыры Буян Кууларны республиканың Аныяктар херектериниң талазы-биле чаа сайыт кылдыр таныштырган. Буян Федоровичини улуг эрге-дужаалга томуйлааны дээрге-ле «Тываның Маадырлары» төлевилелдиң дээштииниң бадыткалы, дириг чижек-тир.
«Аныяк сайытка чедиишкиннерни, чаа үзел-бодалдарны, күчү-күштү, харыысалгалыг албан-дужаалга мерген угаанныг болурун күзедим. Ооң арга-дуржулгазы, быжыг тура-соруу, төрээн черинге бердингени бистиң аныяктарывыс-биле ажылдаар быжыг үндезин болур».
«Тываның маадырлары» — бөдүүн программа эвес, а кадрлар курлавыры болгаш эргелел-башкарылганың чаа философиязы. Ында дайынчы маадырлыг чорук биле хамааты харыысалга, амгы үениң үзел-бодалдары каттышкан. Күштүг, шиитпирлиг болгаш чер-чуртунга ынак шак мындыг бурунгаар чүткүлдүг, чаныш-сыныш чок кижилерни деткиири-биле бо төлевилелди ам-даа сайзырадып калбартыры чугула. Республикавыстың келир үези оларның холунда” — деп, Чазак Баштыңы Владислав Ховалыг демдеглээн.
Бистиң корр.
“Шын” №49 2025 чылдың декабрь 18