Москвага Россияның Хамааты камгалал, онза байдалдар болгаш айыыл-халаптар уржуктарын чайладыр яамызының баштыңы Александр Куренков биле Сибирь федералдыг округта Президентиниң бүрүн эргелиг төлээзи Анатолий Серышев ажыл-агыйжы байдалда ужурашкан.
Коммунал четкилерге озал-ондактарны болдурбазы болгаш ооң уржуктарын чайладырындан эгелээш, Арктикага Россияның ОБЯ-ның аварийлиг-камгалал инфраструктуразын хөгжүдеринге чедир хөй янзы айтырыгларны чугаалашкан. Бүрүн эргелиг төлээниң онза хайгааралында айтырыг – Сибирь регионнарының часкы-чайгы сезонга белеткели аңгы тема болган.
Сибирь регионнарында арга-арыг болгаш хову өрттерин болдурбазы-биле системалыг ажылдар чоруп турарын Александр Куренков таныштырган. 2025 чылда арга-арыг өрттериниң 74 хуузун база хову өрттериниң 95 хуузун баштайгы хонуунда өжүрген, а өртке алыскан девискээрлер 2024 чылга деңнээрге 4 катап эвээжээн. Округ федерациязының субъектилери суг үеринге удур хемчеглерни эки чоруткан, ылаңгыя ээн октаттынган гидротехниктиг тудугларны илередир хемчеглерни база оларның айыыл чок чоруун хандырар планнарны ажылдап кылган.
Эрткен чылга деңнээрге, бо чылын Сибирьниң элээн каш регионнарынга часкы үерлээшкин элээн нарын болур чадавас деп специалистер санап турар. Новосибирск облазында болгаш Алтайда амгы үеде харның кылыны ортумак деңнелден хөй болганындан, суг улгадыр. Оон аңгыда үргүлчүлелдиг сооктардан чер элээн доңган болгаш, эрээн хар чурттакчылыг черлерни ап болур чадапчок.
Россияның ОБЯ-зының Арктикага аварийлиг-камгалал инфраструктуразын хөгжүдери мурнады боттандырар угланыышкын бооп хевээр арткан. Анатолий Серышев Красноярск крайның соңгу талазынче ажылчын үнүүшкүн үезинде, Россия Федерациязының Президентизиниң дузалакчызы Николай Патрушев-биле кады Арктикада далайга эжиндириишкининиң айыыл чок чоруун хандырар база онза байдалдар хайгаараар далайның камгалал-дүүштүрүлге төвүнге база чораан. Төптүң оран-савазын болгаш дериг-херекселдерин чаартыры негеттинип турарын бүрүн эргелиг төлээ демдеглээн.
«Арктика дээрге чугула харылзаа оруктары эртип турар бистиң чуртувустуң кол регионнарының бирээзи-дир. Арктикада кижилер агаар-бойдустуң берге байдалдарында чурттап, ажылдап турары эң кол. Бистиң сорулгавыс – оларга таарымчалыг болгаш айыыл чок байдалдарны хандырар» - деп, Анатолий Серышев айыткан.