Кижилерни патриотчу хөөнге, Төрээн чуртунуң төлептиг хамаатылары кылдыр кижизидеринге күрүнениң ёзулалдары база салдарлыг. Россия Федерациязында күрүне ёзулалдарының бирээзи – Россияның Күрүне тугунуң хүнү. Бо төөгүлүг хүннү 1994 чылда доктаадып тургузуп, ону чылдың-на август 22-ниң хүнүнде демдеглеп турар. Россияның Күрүне тугун бо байырлал хүнүнде российжи күрүнениң шупту девискээринге байырлыы-биле көдүрери доктаамал чаңчыл апарган.
Россияның Күрүне тугун көдүрериниң байырлыг ёзулалы Тыва Республиканың Чазааның бажыңының баарында Арат шөлүнге август 22-де эртен эрте болган. Россияның болгаш Тываның күрүне гимннериниң үделгези-биле көдүрген туктар эртенги хүннүң чырыынга хаяаланып кииский бергеннер.
Россияның Күрүне тугун көдүрериниң байырлыг ёзулалынга Тываның Баштыңы Владислав Ховалыг, ТР-ниң Чазааның кежигүннери, Тыва Республиканың Дээди Хуралының (парламентиниң) Даргазы Каң-оол Даваа, тыва парламентиниң депутаттары, Тыва Республика талазы-биле кол федералдыг инспектор Александр Вавилихин, республиканың хөй-ниити организацияларының төлээлери, шериглер болгаш күрүнениң айыыл чок чорук албанының, иштики херектер органнарының ажылдакчылары киришкен.
Бо күрүне ёзулалының бир онзагай чүүлү – 14 хар четкен назылыг уруглар, оолдарга Россия Федерациязының хамаатызының паспорттарын тывысканы. Тываның Баштыңы Владислав Ховалыг, Дээди Хуралдың Даргазы Каң-оол Даваа, Тыва Республика талазы-биле кол федералдыг инспектор Александр Вавилихин Россияның чалыы хамаатыларынга паспорттарны тывыскан. Олар дээрге Кызылдың 1 дугаар школазының сески классчызы Өлзей Долаан, 16 дугаар лицейниң сургуулу Булат Сарыглар, Кызыл кожууннуң Шамбалыг школазының өөреникчизи Андриян Моңгуш дээш өскелер-даа.
Тываның Баштыңы Владислав Ховалыг паспорттар алган оолдар, уругларга өөредилгеге болгаш хөй-ниити патриотчу ажыл-херектерге чедиишкиннерни күзээн. РФ-тиң паспорттарын алган оолдар, уругларның аразында Баштайгыларның шимчээшкининиң «Бис– Россияның хамаатылары бис!» төлевилелиниң киржикчилери база бар.
Тываның Баштыңы Владислав Ховалыг Россияның Күрүне тугунуң хүнү-биле холбаштыр Тываның чурттакчыларынга байырны чедирген.
«Россияның Күрүне тугунуң хүнү-биле республиканың шупту чурттакчыларынга байырны чедирип тур мен. Россияның үш өңнүг тугу – бистиң чуртувустуң хөй национал чоннарының тура-соруун каңнаан чаңгыс деминиң, төөгүзүнүң болгаш алдарлыг ажыл-херектериниң сүлдези.
Бо чылда ук байырлал бистиң республикавыска бир янзы онзагай. ССРЭ-ниң составынче Тываның эки тура-биле киргениниң 80 чыл оюн октябрь айда демдеглеп эрттирер бис. Бистиң күрүневистиң болгаш республикавыстың сүлделеринге хүндүткелди бөгүн илереттивис.
Россияның үш өңнүг тугу биле Тываның тугун чурттуң болгаш регионнуң гимннериниң үделгези-биле бөгүн Чазак бажыңының чанында Арат шөлүнге байырлыы-биле көдүрдүвүс.
Россия Федерациязының хамаатызының паспортун бөгүн байырлыг байдалга тывысканывыс уруглар болгаш оолдарга байырны чедирип тур мен. Бо болуушкунну олар кажан кезээде сактып алыры күзенчиг. Төрээн чурт оларга чоргаарланып болур ёзулуг патриоттар болуп, күзелдерин боттандырып, боттарын көргүзерин күзедим» — деп, Тываның Баштыңы интернетте бодунуң арынынга бижээн.
Бистиң корр.
Чуруктарны ТМГ-ден алган
“Шын” №64 2024 чылдың август 24
