Тываның Чазааның хуралынга өрт сезону эгелээр хүннү бадылаан. Регионнуң Арга-арыг болгаш бойдус яамызының саналы-биле, өрт айыылының сезонун апрель 4-те кылдыр доктааткан. Оон эгелээш, өрттен онза байдалдарны республика девискээринге болдурбас дээш, бүгү күштү болгаш кичээнгейни ынаар угландырар.
«Метеорологтарның бадыткап турары-биле алырга, апрельде агаарның ортумак температуразы +4, +7 градус чедир чылыыр. Эрткен чылдың көргүзүглеринге бодаарга, 1-2 градус улуг болуп турар. Ол бичии карышкак айыылды тургузуп турар. Чүге дизе агаар-бойдус хенертен чылааш, арга-арыгга өрт өөскүп болур» – деп, Тываның Баштыңы Владислав Ховалыг чугаалаан.
Шиитпирни хүлээп ап тура, арга-арыгга болу бээр өрттерни илередир болгаш өжүрер талазы-биле харыысалгалыг албан чери республиканың Арга-арыг болгаш бойдус яамызы дээрзин Владислав Ховалыг сагындырган. Өртке удур демисел сезонунда өөскүп келген отту өжүрерин мобилизастаар талазы-биле тус черлерниң чагыргаларының ролю улуг дээрзин ол демдеглээн.
Сибирь федералдыг округта бүрүн эргелиг төлээниң чанында Онза байдалдарны болдурбазы болгаш чайладыр талазы-биле ажылдап турар албан черлериниң специалистериниң үнелели-биле алырга, келир өрт сезону берге болур. Арга-арыг болгаш бойдус өрттериниң магадылалы улуг дээрзин баш бурунгаар тодараткан. Май, июнь, сентябрь айларда Тыва Республика девискээринге, Красноярск крайга, Иркутск облазынга арга-арыг өрттери өөскүп болурунуң барымдаазы улуг.
Тыва Республиканың девискээринге 2024 чылда өрт сезону апрель 10-да ажыттынгаш, октябрь 18-те хагдынган турган.
А. ОНДАР ажылдаан.
Чурукту интернет четкизинлден алган
«Шын» №11 2025 чылдың март 27