Тываның Баштыңы Владислав Ховалыг кожа чыдар регионнуң удуртукчузу Валентин Коноваловче кыйгырыг кылган соонда, июнь 4-те Тывага Хакас республикадан өрт өжүрер парашюттуг десант албанының 10 ажылдакчызы келген. Хакасиядан келген өртчүлер коллегаларынга Тожу кожууннуң Алгыяк хем чанында эң-не берге байдалда өрттү өжүреринге дузалажыр.
Тываның Баштыңы Владислав Ховалыг арга-арыг өрттериниң байдалын боду хайгааралда алган. Ажыл-агыйның чорудулгазының дугайында хүннүң-не социал четкиде бодунуң арынында дыңнадып турар.
“Амгы үеде республикада ниитизи-биле 27 арга-арыг өртү тодараттынган. Оларның 6-зын өжүрген, ооң иштинде Тожу кожуунда 3 черде байдал нарын. Өжүрттүнген черлерде чалбыыш таравайн турар. Өртчүлер оларны бүдүнге өжүрүп шыдааннар. Хүлээп алдынган хемчеглерниң ачызында чурттакчы чонга айыыл тургустунмаан” – деп, Владислав Ховалыг дыңнаткан.
Регионнуң диспетчер албанының 2024 чылдың июль 5-тиң 9 шак 30-ниң медээзи-биле, Тыва Республиканың арга-арыг курлавырында 2742,5 га черде 21 өрт демдеглеттинген. Тожу болгаш Каа-Хем кожууннарда 494 га черде 6 өрттү өжүрген.
Каа-Хем, Тожу, Кызыл кожууннарның девискээрлеринде ниитизи-биле 175 га черде 1 хонук дургузунда 5 өрттү өжүрген. Каа-Хем кожууннуң Бүрен-Бай-Хаак, Сизим, Бүрен-Хем арга-арыг участоктарының девискээрлеринге хып турган 3 өрттү хары угда өжүрүп шыдаан.
Бойдустуң онза хайгааралдыг черлери “Убсу-Нур ыйгылаажы” болгаш “Азаста” 51 га черде өрттү өжүрген.
Тожу, Каа-Хем, Таңды кожууннарның арга-арыгларында өрттерни өжүрер ажылдар уламчылап турар.
Арга-арыг өрттерин өжүреринге 268 кижини болгаш 10 техниканы хаара туткан.
Тывада июль 1-ден тура киирген “Онза байдалдар” чурумунуң ажылы уламчылавышаан. Ооң негелделери ёзугаар кижилерниң арга-арыг кирерин кызыгаарлаан.
Ч. СААЯ белеткээн.
Чурукту интернеттен алган.
“Шын” №50 2024 чылдың июль 6
