Россия Федерациязының Чазааның 2012 чылда шиитпири-биле өртектерни чылдың-на өстүрер апарган. Бо чылдың июль 1-ден өртектерни план ёзугаар өстүрер. Ооң дугайында Тыва Республиканың тарифтер албанының удуртукчузу Елена Бочкарёва дыңнаткан.
Чоннуң амыдырал-чуртталгазында кол хереглелдиң ачы-дуза хевирлери чылыг, суг, газ, электри энергиязының өртектерин 2025 чылдың июль 1-ден өстүрер. Чижээлээрге, электри-биле чылыдар дериг-херекселдер тургустунмаан бажыңнарның чурттакчылары энергия өртээн төлээри 58 көпеекке көвүдээр — ол дээрге 5 рубль 14 көпеек. Электри-биле чылыдар дериг-херекселдер тургустунган бажыңнарның чурттакчылары электри энергиязы дээш 3 рубль 60 көпеекти төлээр.
Суг хандырылгазының ачы-дузазының өртээн 1 кубометрде 5 рубль чедир өстүрер.
Чылыг-биле хандырылга ачы-дузазының өртээ 200 рубль боор.
Изиг суг-биле хандырылга өртээ 1 кубометрде 20 рубль апаар.
Бок үндүр сөөртүрүнүң өртээ база көвүдээри чугаажок.
Өртектерни артыкка төлевези-биле, ачы-дуза чедирип турар бүдүрүлгелер-биле санажылганы чорудуп, өртектерни өй-шаанда төлээринче Тыва Республиканың тарифтер албанының удуртукчузу Елена Бочкарёва кыйгырып, чон дээш сагыш човап турар.
ТР-ниң тарифтер албанының медээлеринден.
ТМГ информагентствонуң тырттырган чуруу.
“Шын” №22 2025 чылдың июнь 12