Өртке удур ажылдарны күштелдиреринче кыйгырган

Арга-арыг ажыл-агыйының болгаш чер иштиниң байлактарының ажыглалы яамызының баш бурунгааргы прогнозундан алырга, республиканың арга-арыг фондузунга өрт айыылы апрель 5-тен эгелээр.

Тываның Баштыңы Владислав Ховалыг муниципалитеттерниң болгаш тускай албаннарның удуртукчуларын бойдустуң ала-чайгаар өрттеринге удур демиселче доп-дораан көдүрлүп үнеринче кыйгырган.

«Бөгүн-даарта, адак дизе понедельникте эргежок чугула шиитпирлер хүлээп алдынган турар ужурлуг. Херек болза, арга-арыгже кирерин кызыгаарлаар ужурлуг. Улус-чоннуң харыысалгазының дугайында чарлап дыңнадыр херек. Девискээрлерниң таңныылдаашкынын чорудары күзенчиг. Өрттерниң өжүрүлдезинге хаара тудар кижилерни болгаш техниктиг херекселдерни белениниң шугумунга тударын ханды- рар” – деп, регионнуң Баштыңы айыткан.

Тываның арга-арыг албан черинде маңаа холбашкан ажылдар хайныккан. ТР-ниң арга-арыг ажыл-агыйының сайыды Темир Сарыг-Хааның дыңнатканы-биле алырга, кожууннарның чагырга черлериниң даргалары-биле арга даамылдарының кызыгаарынга арга-арыг өрттерин өжүрериниң планнарын дугуржуп чугаалашкан болуп турар. Дугуржулга-чөпшээрежилгени болгаш чогуур бадылаашкыны эрткен республиканың каттышкан планы база тургустунган.

Бо чылын республика бюджединден 277 сая ажыг рубльди арга-арыгларны өрттен камгалаар хемчеглерже углаан. Ук хемчеглерниң санынче арга-арыг өрттерин баш бурунгаар илередип-тодарадыр база хайгаараар «Лесохранитель» деп системаның садып алыышкыны база кирип турар. 2021–2022 чылдарда ындыг системаларны “Тайга” станциязынга база Балгазынның арга даамылының девискээринге салган турган, олар боттарының ажык-дүжүктүүн болгаш үре-түңнелдиин көргүскеннер. Бо чылын ындыг системаны Шагаан-Арыгның арга даамылының Адар-Төшке салыры көрдүнүп турар.
Агаардан арга-арыг ажылдарының күүселдезин боттандырарынга садыглаашкынны чорутканының түңнелинде, «АК ТуваАвиа» болгаш «АК БОРУС» компаниялар-биле 3 керээни чарган. Чоокку хүннерде ам-даа 3 керээни чарар. Хөлезиге алган 6 агаар хемези камгалал, хайгаарал ажылдарын чорудуп эгелээр. Олар Шагаан-Арыгга, Сарыг-Сепке, Тоора-Хемге болгаш Кызылга базаларлыг болур.

«Арга-арыгны кадагалаары» регион төлевилелиниң иштинге 2023 чылда республиканың өрт өжүрер машина-техниказын 27,6 сая рубль ниити түңге чаартыр. Тускайжыттынган техника май айда-ла Тывага чедип кээр.

/ А. ХЕРТЕК белеткээн.

"Шын" 2023 чылдың апрель 5 №24

#Шынсолун #Тыва #ТываныңБаштыңы #ОнзаБайдал #Өрт #Арга_арыг