Тываның девискээринге өртке удур онза чурумну май 6-дан май 26-га чедир узаткан. Чогуур шиитпирни май 5-те Тыва Республиканың Чазааның ээлчеглиг хуралынга хүлээп алган.
Хүлээп алган доктаалда хамаатыларның арга-арыгга чоруурун кызыгаарлаанының дугайында Тываның Баштыңы Владислав Ховалыг бодунуң блогунга тайылбырлаан. Өртке удур онза чурум үезинде арга-арыгга чүгле тускай чөпшээрелдиг улус чоруп болур. Чөпшээрелди ТР-ниң Арга-арыг ажыл-агый яамызындан база кожууннарның арга-арыг ажыл-агыйларындан ап болур.
Май байырлалдарының бүдүүзүнде Владислав Ховалыг регионнуң чурттакчыларынга кыйгырыынга ховар чараш бойдузун, арга-арыын камгалаарын онзалап демдеглээн: «Өгбелеривистиң бойдуска камныг хамаарылгазының ачызында мындыг онзагай, чараш черлиг бис. Харыысалгалыг болгаш кичээнгейлиг болуп көрээлиңер». Арга-арыг өрттериниң өөскүп үнген чылдагааннарының 79 хуузу кижиден болуп турар деп, ол демдеглээн.
Оперативтиг албан черлериниң медээлеринден алырга, Тыва Республиканың девискээринде бо үеде хову болгаш арга-арыг өрттери бүрүткеттинмээн. Аңаа республиканың дыка хөй кожууннарынга болгулаан чаъстыг болгаш харлыг агаар дээштиг болган. Ниитизи-биле Тывага 2025 чылдың өрт айыылының сезонунуң эгезинден тура тайгаларның 6 396,6 га девискээринге 38 арга-арыг өрттери болгулаан. 2024 чылдың бо үези-биле деңнээрге, республиканың арга-арыглыг черлеринге ниитизи-биле 157,2 га шөлге 8 өрт бүрүткеттинген. Ынчап кээрге, өрттер саны 30 таварылга хөй, а өрттерниң шөлү 51 катап өскен.
Тыва Республиканың арга-арыг фондузунуң черлеринге өрт айыылының сезонун 2025 чылдың март 31-де албан езузу-биле чарлаанын сагындыраал. Өрт айыылының байдалы нарыыданы-биле Тываның Баштыңының шиитпири-биле апрель 15-тен май 5-ке чедир өртке удур тускай чурумну чарлаан турган. Хамаатыларны арга-арыгже кирерин баш бурунгаар шуут хораан. Таңды кожууннуң суурларынга улуг айыылды тургускан арга-арыг өрттери дээш, апрель айда арга-арыгга муниципалдыг онза байдал чурумун чарлаан.
Бистиң корр.
“Шын” №17 2025 чылдың май 8