Тывада агаарның температуразы кудулааны-биле, өрттер саны эвээжеп, арга-арыгда өртке алыскан шөлдер кызырылганы демдеглеттинген.
Сентябрь 1-ниң 18.00 шакка чедир республиканың арга-арыг фондузунуң девискээринде ниитизи-биле 94 хире га черде улуг эвес ийи арга-арыг өрттери болган. Чөөн-Хемчик кожууннуң девискээринде онза байдал чарлаттынган. 2025 чылдың өрт сезону эгелээнден бээр ниитизи-биле 18106,98 га шөлге 175 арга-арыг өрттери бүрүткеттинген.
Тывада арга-арыг өрттери колдуунда бойдустуң болуушкуннарындан – чаъс-чайыктан, чаңныктардан база кижиниң буруузундан үнүп турар. Өрт-биле демиселде күштер болгаш курлавырлар четчир: чер-черлерде 50 кижи болгаш 10 санныг тускай техника ажылдап турар.
Тыва Республиканың Чазааның 2025 чылдың август 28-те № 428 Чарлыы-биле, 2025 чылдың август 28-тен сентябрь 17-ге чедир Тыва Республиканың девискээринде өртке удур айыыл чок чорукту болгаш өртке удур тускай чурумну хандырары-биле, арга-арыгже хамаатыларның база автотранспорт аймааның кирерин кызыгаарлаан. Арга-арыг ажыл-агыйлары Россия Федерациязында өртке удур айыыл чок чоруктуң дүрүмнерин сагыыр база хову шөлдерге кургаг сиген өрттедирин болдурбас дээш, регионда арат-тараачын ажыл-агыйлары-биле 1,1 муң ажыг керээлерни чарган.
Өртке удур эрткен сезон иштинде күрүне инспекторлары 2 муң ажыг хыналданы чоруткан, өртке удур айыыл чок чоруктуң дүрүмнерин хажытканы дээш, 38 административтиг херекти долдурган. Россияның Онза байдалдар яамызының ТР-де кол эргелелиниң хайгаарал болгаш профилактика ажылының эргелелинче арга-арыг өрттериниң буруулуг кижилерин илередири-биле 172 билдириишкинни киирген, ол дээш хыналдалар чоруп турар.
Бистиң корр.
Чурукту интернет четкизинден хоолгалаан.
“Шын” №34 2025 чылдың сентябрь 4