«Бо чылдың эгезинден тура Россияның Онза байдаладр яамызының Тыва Республикада Кол эргелелиниң өрт өжүрер камгалал салбырлары республика девискээринге 21 өрттү өжүрген. Эрткен чылдың бо-ла үези-биле деңнээрге, өрттер саны көвүдээн. Колдуунда чуртталга бажыңнарынга айыыл-халап бүрүткеттинген» — деп, ОБЯ-ның парлалга албаны дыңнадып турар.
Печкаларны дүн-хүн чокка одап, электри-биле ажылдаар чылдыр херекселдерни кыпсып, айыыл чок чоруктуң негелделерин хажыдып турары-биле ол бүгү холбашкан. Оон аңгыда, кижилерниң харыысалга чок болуп турары база улуг салдарлыг. Оран-сава иштинге таакпыны өжүрбейн октаптарга, өрт өөскүп үнген таварылгалар эвээш эвес. Кышкы соок үелер ам-даа уламчылаар. Ынчангаш чоок кижилерин база оран-савазын камгалап алыры-биле оваарымчалыг, кичээнейлиг болуру чугула.