Тываның В. Көк-оол аттыг Национал хөгжүм-шии театрынга Москваның Станиславский болгаш Немирович-Данченко аттыг академиктиг хөгжүм театрының балет артизи Сүбедей Дангыттың артист эш-өөрү-биле кады организастаан концерти болуп эрткен.
«Сүбедей эш-өөрүн чыып тур» деп программаның иштинде он кайгамчык күүселделерни артистер бараалгаткан. Көрүкчүлерниң сонуургалын оттуруптар көрүштүг, кайгамчык чараш классиктиг болгаш амгы үениң танцы-самын алды аныяк артист күүсеткен.
«Тываже кажан-даа кээп көрбээн болгаш, 2022 чылда Сүбедей бир дугаар концертин үндүрүп турда-ла, келиксээн мен. Ынчалза-даа ажылымның аайы-биле кээп шыдавайн барган мен. Бөгүн ийи танцыны көргүстүм. Оларның бирээзин Сүбедей-биле күүсеттим» – деп, Астраханьның опера болгаш балет театрының солизи Анастасия Грачева чугаалаан.
ТР-ниң Культура яамызы Сүбедейниң баштайгы-даа, амгы-даа концертин деткээн. Концерт бетинде ТР-ниң культура сайыды Виктор Чигжит аныяк артистер-биле ужурашкаш, оларга суй белектерни сөңнээн.
«2022 чылда Тывага баштайгы оюн-тоглаазын көргүзүп турда, ТР-ниң Баштыңы Владислав Ховалыг Сүбедей Дангытка ТР-ниң алдарлыг артизи деп атты тывыскан. Чаңгыс чер чурттугларывыстың үзел-бодалы, эгелээшкини-биле шак мындыг хемчеглерниң республикавыста удаа-дараа болуп турары өөрүнчүг-дүр» – деп, Виктор Чигжит демдеглээн.
Бистиң корр.
"Шын" №54 2024 чылдың июль 20
