Республиканың эрге-чагыргазы социал хөмүр айтырыынче шыңгыы кичээнгейни салып турар. ТР-ниң Чазааның чанында оперативтиг штабтың ээлчеглиг хуралынга келир кышкы одалга сезонунга белеткелдиң сайгарылгазының үезинде хөмүр-дашты кожууннар, сумуларже сөөртүп чедиреринче, эң ылаңгыя «Социал хөмүр-даш» программа-биле чединмес өг-бүлелерге бээр хөмүр-даштың шынарынче шыңгыы кичээнгейни салган.
2024–2025 чылдың кыжында чединмес социал байдалдыг болгаш 18 хар четпээн 4-тен хөй ажы-төлдүг өг-бүлелерни одаар чүүл-биле хандырарынга 12 242 700 рубль акшаны республиканың бюджединден тускайлап үндүрген. 2856 өг-бүле одаар чүүлдү «Социал хөмүр-даш» программа шугуму-биле алыр. Оларның аразындан 2791 өг-бүлеге хөмүр-дашты, 65 өг-бүлеге одаар ыяшты бээр. Социал хөмүр-дашты алыр өг-бүлелерлиг 114 суурга хөмүр-дашты сөөртүп чедирерин организастаар ажыл амгы үеде чоруп турар.
Эң хөй социал хөмүр-дашты Чөөн-Хемчик кожуунга сөөртүп чедирер. Бо кожууннуң 12 суурунда 425 өг-бүле социал хөмүр-дашты алыр. Бир өг-бүлеге 2 тонна деп чижеглеп санап үндүрерге, бо кожуунга 850 тонна ажыг социал хөмүр-дашты сөөртүп чедирер-дир. Эвээш эвес хөмүр-даш, ону сөөртүп чедирериниң чарыгдалдары база бар болгай.
Сентябрь айның эгезинде Кызыл хоорайда болгаш кожууннарның төптеринде складтарга хөмүр-дашты элээн хөйү-биле сөөртүп эккеп эгелээн. Кызыл хоорайда складтарда 1 тонна хөмүр-даштың өртээ 3 315 рубль, Вавилин ээтпээнде склад- та – 3 511 рубль.
Кызыл хоорайдан ыраан тудум, хөмүр-даштың өртээ улгады бээр. Таңдының Бай-Хаакта складта 1 тонна хөмүр-даштың өртээ 3 974 рубль, Өвүрнүң Хандагайтыда– 4 027, Мөңгүн-Тайгада Мугур-Аксында складта – 5 853 рубль. Хөмүр-дашты кожууннар төптеринден складтардан суурларга аппарып дүжүрерге, транспорт чарыгдалдары база немежир.
Чурттакчы чон хөмүр-дашты садып ап турар. Орулгазы эвээш өг-бүлелерге халаска бээр хөмүр-дашты сөөртүп эгелээр.
Ш. МОҢГУШ.
Чурукту интернет четкизинден хоолгалаан.
«Шын» №69 2024 чылдың сентябрь 11