Моол күрүнениң Баян-Өлгий аймактың Цэнгэл сумузунуң чурттакчызы чораан Шуңгуур-Иргит Жамбаа оглу Баярхүүнүң чыып, үүжелеп чораан тѳѳгүзүн, ханы уткалыг чагыгларын, шүлүктерин, очулга ажылдарын ном кылдыр чыып тургускаш, чырыкче үндүрер ажылды уруу Болормаа Баярхүү уламчылаан. Ук номнуң ады «Сүт чагыг».
Ноябрь 10-да Тыва национал музейге «Сүт чагыг» деп номнуң ак дою болуп эрткен. Ном актаашкынының киржикчилери – эртем-шинчилел ажылдакчылары, Тываның күрүне университединиң башкылары, Чогаалчылар эвилели, хоочуннар, культура ажылдакчылары база номну чырыкче үнеринге улуг дузаны кѳргүскен улуг-биче чонувус.
Цэнгэл сумузунда чаңчылчаан тыва культураның адырларын сайзырадыр болгаш нептередиринге улуг үлүг-хууну киирип, чаш салгалдарывыска үндезин культуравысты дамчыдып, оларга үлегер-чижек болуп чорууру дээш Иргит уруу Баярхүү Болормаа Тыва Республиканың Дээди Хуралының баштыңының мурнундан өөрүп четтириишкин бижии-биле шаңнаткан.
Тыва үндезин культура төвүнүң медээзинден.
«Шын» №87 2023 чылдың ноябрь 15
