Сүт-Хөл кожуунга июнь 11-ден тура онза байдалдың чурумун чарлаан. Ук кожууннуң Өг-бүлелерге болгаш уругларга социал деткимче көргүзер төвү когаралга таварышкан назы четпээн ажы-төлдүг өг-бүлелерниң даңзызын тургускан.
Ишкин, Суг-Аксы, Алдан-Маадыр болгаш Бора-Тайга сумуларда бойдустуң халавындан 223 ажы-төлдүг 133 өг-бүле когарааны илерээн.
ТР-ниң Күш-ажыл болгаш социал политика яамызының дыңнадыы-биле алырга, бо сумуларның чурттакчы чонунуң картофель олурткан шөлдери улуг когаралга таварышкан. Каражага таварышкан өг-бүлелерге катап олуртуру-биле картофель үрезиннерин үлээр ажылды ТР-ниң Күш-ажыл болгаш социал политика яамызы биле Сүт-Хөл кожууннуң чагыргазы чоруткан.
/ ТР-ниң Күш-ажыл болгаш социал политика яамызының медээлеринден.
"Шын" №44 2023 чылдың июнь 17