Бо кыжын Тываның агаар-бойдузу ооң мурнунда чылдарга көөрде, 40–50 градус сооктар чок, чүгээр чылыг болуп турар. Ынчалза-даа хүннүң чыгыы бичиилеп чаап турар хар дүвүрелди оттуруп эгелээн.
Күш-ажылдың күрүне инспекциязы ажыл берикчилериниң кичээнгейинге, хар аштаар ажылчыннарынга айыыл чок чорукту тургузар талазы-биле ажылдарны баш бурунгаар чорударын сагындырып турар.
Күрүнениң күш-ажыл инспекциязының ТР-де удуртукчузу Эдуард Доржунуң чугаалааны-биле алырга, дээвиирлер кырындан хар дүжүрер бетинде айыыл чок чорукту баш бурунгаар тургузары чугула. Аңаа хамаарыштыр тускай дүрүмнер-даа бар. Ону сагыыр болза эки.
Тускай өөредилге болгаш белеткел эрткен дуржулгалыг хамаатылар дээвиир кырында хар аштап, ажылдап болур дээрзин ол демдеглээн.
«Ажыл берикчилери бо айтырыгга хамаарыштыр харыысалгалыг болур ужурлуг. Хар аштаар улусту тускай экипировка-биле чүмнээри – ажыл берикчизиниң хүлээлгези. Оон аңгыда, хар аштаар ажылдарга назы четпээн хамаатыларның күш-ажылын ажыглап болбас» – деп, Эдуард Доржу демдеглээн.
Ол ышкаш хар аштап турар девискээрни долгандыр кызыл кожаа шөйгеш, кижи кылаштаар оруктарны түр үеде дуглаары чугула. Дээвиириниң харын аштап турар бажыңның девискээринде кызыл кожаа-даа шөйүп каан болза, адаанга ажылчыннар база эрткен-дүшкен улусту хыналдага алыр ужурлуг» – деп, удуртукчу сагындырган.
Бистиң корр.
Чуруктарны интернет четкизинден алган.
«Шын» №4 2025 чылдың февраль 6
