Президент Владимир Путинниң шиитпири езугаар, «Чурттаар оран-сава болгаш хоорай хүрээлели» национал төлевилелдиң «Таарымчалыг хоорай хүрээлеңин хевирлээри» федералдыг төлевилелдиң боттандырылгазы-биле Чеди-Хөл кожууннуң Сайлыг сумузунда стадионну чаагайжыдар ажылдар эгелей берген.
Эрткен чылын чеди-хөлчүлер ук төлевилелдиң онлайн бадылаашкынынга идепкейлиг киришкениниң түңнелинде, бо чылын Сайлыг суурнуң стадионун чаагайжыдар эргени чаалап алганнар. Сайлыгжылар чаагайжыткан чараш стадионга спорт-биле өңнүктежип, агаарлаар аргалыг болурлар.
2024 чылдың апрель айның ортузундан тура хүлээникчи тудуг организациязы “Оникс” КХН-ниң ажылдакчылары шөлчүгештиң девискээрин белеткеп, черниң кырыкы довураан казар ажылдарны чорудуп турар.
Сайлыг сумузунуң чагырыкчызы Аяс Комбу стадионну чаартыр ажылдың дугайында дыңнаткан: “Амгы үеде “Оникс” хүлээникчи организацияның 2 ажылдакчызы шөлчүгештиң белеткел ажылдарын чорудуп турар. Шак бо программа ёзугаар маңаа баскетбол-даа, хол бөмбүү-даа ойнап болур шөлдү кылыр бис. Ол ышкаш стадионга чүгле бөмбүк ойнаар шөл эвес, чурттакчы чонга спорт-биле эртен-даа, кежээ-даа өңнүктежиринге эптиг болзун дээш, стадионну долгандыр сайгылгааннарны база салыры көрдүнген. Стадионну чаагайжыдарынче ниитизи-биле 2 сая рубльди аңгылаан. “Оникс” КХН чардынган керээ ёзугаар ооң чаагайжыдылгазын бо күзүн доозар”.
Сумунуң чурттакчы чону аңаа өөрүп, чаарттынган стадионну четтикпейн манап турарлар.
“Үениң сайзырааны-биле аныяк-өскен база чаш ажы-төл шоолуг шимчээшкин чок олурар апарган. Кижи шимчеп-ле чоруур болза, кадык болур. Стадионга хол бөмбүү, баскетбол ойнаар шөлдер кылгаш, сайгылгааннар салыптар болза, кандыг-даа кижи сонуургап кээп, ойнап, эртен, кежээ шошкуп, кадык амыдыралды тудуп эгелээр дээрзинге идегеп турар мен. Ынчангаш боттарывыс база чаа шөлге ойнаксааш, дүрген болгаш шынарлыг кылдыр кылып доозар дээш кызып турар бис. Белеткел ажылдары барык доозулган. Ооң соонда бетон-биле кудар ажыл эгелээр. Улаштыр резин-биле шывар бис” – деп, сумунуң чурттакчызы, “Оникс” КХН-ниң ажылдакчызы Николай Макаров чугаалаан.
Чеди-Хөл кожуунга 2019 чылда «Таарымчалыг хоорай хүрээлеңин хевирлээри» федералдыг төлевилелдиң ачызында Хову-Аксынга болгаш Хендерге суурларга Алдарның аллеяларын, Хову-Аксының Гагарин кудумчузунда чадаг кижи кылаштаар тротуарны, Элегес суурда футбол шөлүн база чаагайжыткан.
Бодунуң боттанылгазының үезинде «Таарымчалыг хоорай хүрээлеңин хевирлээри» федералдыг төлевилел Россия Федерациязының 84 субъектизин хаара туткан. Оларның кайызында-даа чедиишкиннер болгаш онзагай чүүлдер хөй. Тывада бо төлевилел-биле 145 хөй-ниити девискээрин чаагайжыткан.
Чыжыргана СААЯ.
Буян Ооржактың тырттырган чуруктары
«Шын» №35 2024 чылдың май 15
