Бичии чаштар чаңгыс аай ойнаарактар-биле үр ойнап шыдавастар. Хар-назын аайы-биле оларның кичээнгейи чүгле 10-20-30 минута уламчылаар. Ойнавастай берген ойнаарактарын кезек үе иштинде чажыра шыгжап каап болур силер. Ынчангаш оларга янзы-бүрү, аңгы-аңгы, солун оюннардан чогаадып, чаа чүүлдер-биле чаштарывысты таныштырып, алаактырып, сонуургадып, өөретпишаан ойнаарга, олар аажок амыраарлар. Чижээ, салааларга кедер театр (пальчиковый театр) чаштарның чугаа сайзыралынга кончуг дузалыг.
Өңнүг принтерге үндүрүп алгаш, кезип ап болур, бир болза өңнүг карандаштар-биле чуруп алгаш, албан бо чуруктарда ышкаш эвес-даа болза, чаштарга тааржыр, боттарыңарның эки билир орус чоннуң тоолдарының маадырларын-даа дүрзүлеп чурааш, чогаадып ап болур. "Борбак далган" (Колобок), "Шокар дагаа" (Курочка ряба), "Репка дугайында тоол" дээш оон-даа өскелери бар. Чүгле тыва дыл кырынга тоолдап бээр болзуңарза эки, оларга билдингир болгаш чедимчелиг кылдыр.
Чаштарыңар-биле эки чугаалажып, ойнап-ла турар болзуңарза, оларның сайзыралынга дыка эки, чугаазы эртежик, дораан үнер. Кылып турар чүүлдериңерни, кылыгларыңарны шуптузун сөстер-биле, чугаа-биле кады чорудары дээрге чаш кижиге чугула херек, чугаазы үнмээн-даа болза, бичии кижи ол сөстерни, чугааны шиңгээдеп билип ап, сактып ап олурар боор. Чүнү билирил бо деп кажан-даа ынчаар бодавас болза эки.
ТР-ниң Национал школа хөгжүдер институттуң медээзи болгаш чуруктары.
“Шын” №29 2025 чылдың июль 31